त्रिभुवन अन्तर्राष्ट्रिय विमानस्थलय् दमकलया अभाव

येँ – देय्या छगू जक अन्तर्राष्ट्रिय विमानस्थल त्रिभुवन अन्तर्राष्ट्रिय विमानस्थलय् दमकलया अभाव जूगु खँ सीदुगु दु । अन्तर्राष्ट्रिय विमानस्थलया सुरक्षाया निंतिं तयातःगु दमकल पुलां जूगु दुसा उकिं यानाः अत्यावश्यक सेवाया निंतिं समस्या जूगु दु । थौंकन्हय् विमानस्थलय् न्यागः दमकल दु । उकीमध्ये निगः तसकं पुलां जुइ धुंकूगु दु ।

छगः नीन्यादँ पुलांगु खःसा मेगु छगः नीनिदँ पुलांगु खः । थ्व निगः बाहेक ल्यं दुगु स्वंगः दमकलं विमानस्थलय् सम्भावित छुं नं कथंया आपतकालीन घटना नियन्त्रणया निंतिं ज्या कायेमाः स्थिति दु । विमानस्थल थेंज्याःगु थासय् अत्यावश्यकीय सेवाया रुपय् दमकलया २४ घन्टा हे तयारी अवस्थाय् तया तयेमाः ।

तर लिपांगु इलय् देय्या छगू जक अन्तर्राष्ट्रिय विमानस्थलय् दमकलया अभावया कारणं अज्याःगु सेवा बीत तकं समस्या पिहां वयाच्वंगु खँय् सरोकारवालातय्सं चिउताः प्वंकूगु दु । विमानस्थलया उद्धार तथा अग्नि नियन्त्रण महाशाखाया कथं पुलांगु निगः दमकल ज्या हे मवइगु अवस्थाय् थ्यने धुंकूगु दु ।

अन्तर्राष्ट्रिय नागरिक उड्डयन संगठन (आइकाओ)या मापदण्डकथं नं विमानस्थलय् म्होतिं नं स्वंगः दमकल तयारी अवस्थाय् तयातयेमाःगु आवश्यक जू ।हवाई क्षेत्रया जानकारी दीपेन्द्रमान श्रेष्ठं अग्नि नियन्त्रक व मेमेगु भौतिक सुविधाय् ध्यान बीमाःगु खँय् बः बियादिसें वय्कलं पुलांगु व ज्या काये मजीधुंकूगु स्यंगु दमकल तयातयेगु स्वयां तत्काल न्हूगु दमकल न्यायेगु प्रक्रिया न्ह्याकेमाःगु सुझाव बियादी ।