सम्मान, स्वास्थ्य शिविर व विद्यालय भवन हस्तान्तरण

काभ्रे – थनया बनेपा नगरपालिका वडा नं. २ लय् श्रीरत्न चुण्डेश्वर माध्यमिक विद्यालय व खुड्किला नेपाल नांया संस्थाया मंकाः ग्वसालय् सम्मान व स्वास्थ्य शिविर ज्याझ्वः जुल । व्यवस्थापन समितिया अध्यक्ष विदुर गिरीया सभापतित्वय् जूगु ज्याझ्वःया उलेज्या वरिष्ठ समाजसेवी नापं बासुदेव प्रसाद जोशी स्मृति प्रतिष्ठानया अध्यक्ष लक्ष्मणशरण जोशीं त्वाःदेवाय् मत च्याकाः यानादीगु खः । ज्याझ्वलय् २०७२ सालया तःभुखाचं क्षति जूगु विद्यालय खुड्किलो नेपालं मर्मत व रंगरोगन लिपा विद्यालययात लःल्हाःगु खः ।

उगु इलय् संस्थापाखें विद्यालय मर्मतया ज्याय् ग्वाहालि यानादीपिं व्यवस्थापन समितिया अध्यक्ष, विद्यालयया प्रधानाध्यपक, सहप्रधानाध्यापक, संस्थाया हे पुलांम्ह अध्यक्ष लगायत थीथी व्यक्तित्वपिंत संस्थाया अध्यक्ष तारा राईं सम्मान यानादीगु खः । ज्याझ्वःया मूपाहां जोशीं सहयोगी दातातय् ग्वाहालिं ह. विद्यालय थनतक थ्यने फुगु धासें सरकारं नं उचित व्यवस्थापन यात धाःसा सरकारी विद्यालय नं निजी विद्यालय सहर विकास याये फइगु खँय् बः बियादीगु खः । बनेपा नगरपालिका वडा नं. २ या वडाअध्यक्ष हरिशरण घिमिरें विद्यालयया वडापाखें फक्व ग्वाहालि याना वनेगु प्रतिवद्धता प्वंकादीगु खः ।

अथे हे विद्यालय परिसरय् हे वा, छातिया स्वास्थ्य परीक्षण यायेगु नापं खैया नं जांच यायेगु ज्यां जूगु खः । विशेष यानाः विद्यालयया विद्यार्थी व अभिभावकपिंत लक्षित यानाः जूगु शिविरय् ७६ या वा व ४० या खैया जाँच यायेगु ज्या जूगु खः । शिविरय् नेपाल क्षयरोग निवारण संस्था ख्वप, लायन्स क्लब अफ काठमाडौं समर्पित, खुड्किलोनेपाल व ओम समाज डेन्टल हस्पीटलं ग्वाहालि याःगु खः । ज्याझ्वलय् विद्यालयपाखें मूपाहां, विशेष पाहां, पाहांनापं स्वास्थ्य शिविरय् ग्वाहालि याःपिंत मतिनाचिं लिसें सुभाय् पौ लःल्हाःगु खः ।