सरकारया कारणं हे संक्रमण अप्वइ

येँ (नेपालभाषा टाइम्स) – सरकारया हे कारणं देशय् कोरोना संक्रमण झन् तच्वइगु खतरा ब्वलंगु दु । थौंकन्हय् तसकं म्हो ल्याखय् जक कोरोना संक्रमणया परीक्षण जुयाच्वंगु दु । थ्व परीक्षण म्हो जूगु संक्रमितत म्हो जुयाः मखुकि सरकारं छगू निश्चित समूहयात बाहेक मेपिनि कोरोना परीक्षण ध्यबा कायेगु जक निर्णय याःगुलिं खः ।

सरकारं ध्यबा कयाः जक कोरोना परीक्षण यायेगु निर्णय याःगुलिं गुलिखे मनूत लक्षण खनेदुसां परीक्षण याःवनाच्वंगु मदु। ध्यबा कायेगु निर्णय लिपा कन्ट्याक्ट ट्रेसिब नं म्हो जूवंगु दु। अथे जूबलय् परीक्षण तसकं म्हो जूवंगु दु । परीक्षण म्हो जूगु कारणं संक्रमितत नं थःके कोरोना मदु धकाः न्ह्याथाय् नं पिहां वनेगु, न्ह्याम्हेसितं नापलायेगु ज्या जुयाच्वंगु दु। थुकिं यानाः संक्रमण झन् तच्वइगु खतरा ब्वलंगु खँ विज्ञतय्सं धाःगु दु ।

विज्ञतय्सं धाःगु दु, ‘मेमेथाय् देशय् संक्रमण अप्वयेवं परीक्षण झन अप्वयेका यंकीगु खः, तर नेपालय् धाःसा सरकारया हे कारणं परीक्षण म्हो जूवंगु दु । थुकिं यानाः लिपा फये हे मफइकथं संक्रमण अप्वइगु खतरा ब्वलनाच्वंगु दु ।’

सरकारं न्हि २६ हजार तका परीक्षण यायेगु क्षमता दु धयाच्वंगु दु, तर थौंकन्हय् थुकिया बछि नं परीक्षण जुयाच्वंगु मदु। निःशुल्क यानातःबलय्टे कुइबय् च्वंगु राष्ट्रिय प्रयोगशालाय् जक न्हि १५ सय धयाथें परीक्षण जुइगु खःसा आः शुल्क कायेगु सुरु यायेधुंकाः न्हि न्यासः नं परीक्षण जुयाच्वंगु मदु । अथेहे टेकुया हे शुक्रराज ट्रपिकल तथा सरुवा रोग अस्पतालय् न्हि खुसःम्हेसिया परीक्षण यायेगु क्षमता दुसां थौंकन्हय् निसःया ल्याखय् जक परीक्षण जुयाच्वंगु दु ।

राष्ट्रिय प्रयोगशालाया सूचना अधिकारी राजेशकुमार गुप्तां न्हापां कन्ट्याक्ट ट्रेसिङ पाखें यक्व स्वाब परीक्षणया निंतिं वइगु खःसां आः थ्व तसकं म्हो जूवंगु खँ कनादीगु दु । स्वाब परीक्षणया निंतिं शुल्क कायेगु सुरु जुइवं कन्ट्याक्ट ट्रेसिङय् लाःसां ध्यबा पुले मफुपिं यक्व दयाच्वनीगु जूगुलिं परीक्षण याकः मवयाच्वंगु दुसा न्हापा न्हापा स्थानीय तहया समन्वयय् मंकाः कथं स्वाब संकलन जुइगु नं आः मजुयावंगु दु। सरकारं वंगु कात्तिक २ गते हे स्वाब परीक्षण व उपचारया निंतिं ध्यबा कायेगु निर्णय याःगु खः । थुकियात वंगु कात्तिक १४ गते निसें लागू नं यायेधुंकूगु दु ।

संक्रामक रोग विशेषज्ञ डा. शेरबहादुर पुनं परीक्षण गुलि अप्वः यायेफत उलि समुदाय स्तरय् जुइगु संक्रमण पने फइ धासें धयादीगु दु । ‘परीक्षण हे मजुल धाःसा कोरोना भाइरस पुन धयागु हे सीमखु, अले व पिने चाःहिला जुल धाःसा अज्याःम्ह मनुखं यक्वसित थ्व भाइरस पुंकाबी ।’