मूल पाइपं लः यंकूपिंत बिल पेश यायेत निर्देशन

येँ – खानेपानी महसुल निर्धारण आयोगं मूल पाइपं लः यंकूपिं ग्राहकया नं व बिल पेश यायेत काठमाडौं उपत्यका खानेपानी लिमिटेड (केयुकेएल)यात निर्देशन बिउगु दु । आयोगं स्वनिगलय् लः वितरणया निंतिं हयातःगु त्वने लःया मूल पाइपं हे लः वितरणया निंतिं छेँय् यंकूपिं ग्राहकया नं व बिल पेश यायेत केयुकेएलयात निर्देशन बिउगु खः ।

आयोगय् जूगु सहलहया इलय् केयुकेएलयात अज्याःपिं ग्राहकया नं व बिलसहित लिखित रुपं जवाफ बीत निर्देशन बिउगु खः । आयोगया ज्याकुथिइ जूगु सहलहया इलय् केयुकेएलयात उकथं जवाफ पेश यायेत निर्देशन बिउगु खः । बागमतिं स्वनिगलय् वितरणया निंतिं हयातःगु लःया मूलपाइपय् अवैघ रुपं प्वाः खनाः पाइप तयाः लः यंकाच्वंगु किपा सार्वजनिक जुइवं आयोगं केयुकेएलयात सहलहया निंतिं सःताः उकथंया निर्देशन बिउगु खः ।

सुन्दरीजलं स्वनिगलय् लः वितरणया निंतिं हयातःगु बागमतिया लः गोकर्णेश्वर नगरपालिकाया थीथी थासय् मूल पाइपय् प्वाःखनाः पाइप तयाः लः वितरण यानाच्वंगु किपा सार्वजनिक जूगु खः ।गोकर्णेश्वर नगरपालिकाया वडा नं. २ व ४ स्वाइगु कोलमति खुसिइ पाइप प्वाः खनाः लः बस्ती वितरणया निंतिं यंकाच्वंगु उगु किपा दकलय् न्हापा राष्ट्रिय समाचार समितिइ पिहां वःगु खःसा वयां लिपा थीथी अनलाइन व सामाजिक संजालय् तकं पिहां वःगु खः ।

केयुकेएलया करिब १० दँ न्ह्यःया छगू प्रतिवेदनकथं स्वनिगलय् वितरण जुइगु लःमध्ये ४० प्रतिशत स्वयां अप्वः चुहावट जुयाच्वंगु दु । चुहावट सम्बन्धय् लिपांगु इलय् अध्ययन मजूगुलिं थ्व स्वयां नं अप्वः चुहावट जूगु दयेमाः धइगु केयुकेएलया अनुमान दु । लुमंकेबहजू, मूल पाइप प्वाः खनाः बस्ती लः वितरण यानाच्वंगु किपा सार्वजनिक जुइवं आयोगं वंगु जेठ १४ गते केयुकेएलयात तत्काल पौ च्वयाः लःया खुया यंकूगु सम्बन्धय् सहलह यायेत सःतूगु खः ।