एमालेया ‘माओवादी’ मन्त्रीतय्गु पद चट्, खिमलाल त्यात

येँ – सर्वोच्च अदालतं म्हिगः छगू फैसला यासें सांसद मजुसे सरकारय् दुथ्यानाच्वंपिं न्हय्म्ह मन्त्रीतय्त ज्या याके मते धासें उमिगु मन्त्री पद बदर याना बिउगु दु । सांसद मखुसां मन्त्री जुयाच्वंपिं थ्व न्हय्म्हं माओवादी त्वःताः एमालेय् दुहां वःपिं खः । वय्कःपिं खः– रामबहादुर थापा, टोपबहादुर रायमाझी, लेखराज भट्ट, प्रभु साह, गौरीशंकर चौधरी, मणिचन्द्र थापा व दावा लामा । वय्कःपिंत सांसद मदुसां नं निक्वःखुसी मन्त्री दयेकूगु धासें सर्वोच्च अदालतय् लाःगु रिटयात कयाः म्हिगः फैसला जूगु खः ।

प्रधानन्यायाधीश चोलेन्द्रशम्शेर जबराया एकल इजलासं वय्कःपिं न्हय्म्हेस्यां मन्त्री पद खारेज जुइगु फैसला याःगु खः ।

थुकिया नापनापं म्हिगः राष्ट्रिय सभाया खाली जुयाच्वंगु छगू सिटया लागिं जूगु मतदानय् नं एमालेया उम्मेदवार लिसें गृहमन्त्री रामबहादुर थापा बादल पराजित जूगु दु । वय्कःयात बुकाः विपक्षी पार्टीया उम्मेदवार डा. खिमलाल देवकोटा निर्वाचित जुयादीगु खः । थ्व पराजय लिपा गृहमन्त्री थापा आः हानं मन्त्री जुइगु सम्भावना पूरा हे समाप्त जूगु दु ।

थौंकन्हय् एमाले दुने माधव नेपाल पुचलं न्ह्यःने हयाच्वंगु मागयात सम्बोधन याये कथं पार्टीयात वि.सं. २०७५ जेठ ३ गते न्ह्यःया अवस्थाय् यंकेगु धकाः खँल्हाबल्हा जुयाच्वंगु दु । उकिया लागिं पार्टी अध्यक्ष लिसें प्रधानमन्त्री केपी ओली नं सहमत जुयादीगु खँ पिहां वःगु दु । छुं जुयाः पार्टीयात २०७५ जेठ ३ गते न्ह्यःया अवस्थाय् यंकेगु ज्या जुल धाःसा माओवादी त्वःताः एमालेय् वःपिं थ्व नेतातय्गु केन्द्रीय सदस्य पद नं खारेज जुइ ।