ने. सं. ११४६ सिल्लाथ्व षष्ठी -

‘जातीय मुद्दा मेकथं दना वयेफु’

पुलांम्ह प्रधानमन्त्री डा. बाबुराम भट्टराईं धयादी –

येँ – पुलांम्ह प्रधानमन्त्री लिसें नयाँ शक्ति पार्टीया संयोजक डा. बाबुराम भट्टराईं आः नकतिनि एमाले व माओवादी केन्द्र निगू पार्टी एकीकरण जुइधुंकाः पहिचानया मुद्दा ध्याकुनय् लाः वनीगु खतरा अझ अप्वया वःगु खँ कनादीगु दु । ‘नेपालभाषा टाइम्स’ लिसे खँ ल्हासें वय्कलं नेपाः छगू बहुराष्ट्रिय चरित्र दुगु देश जूगु कारणं थुकियात सम्बोधन मयाःतले नेपाःया राष्ट्रियता बल्लाइ मखु धकाः नं धयादीगु दु ।

माओवादीया तत्कालिन नेता लिसें आः नेकपाया अध्यक्ष प्रचण्ड एमालेय् ‘विलिनीकरण’ जुइधुंकाः जक मखु न्हापा थःपिं नापं च्वंच्वनागु इलय् तकं जातीय मुद्दाय् चुलुया वनाच्वंगु द्वपं नं डा. भट्टराईनं बियादिल । वय्कलं धयादिल, ‘प्रचण्डजी एमालेपाखे आकर्षित जुयादीगुया अनेक कारण मध्ये छगू कारण उमिगु जातीय मुद्दायात स्वयेगु दृष्टिकोण मिले जूवंगुलिं नं खः ।’

एमालेय् अध्यक्ष केपी ओली जक मखु वयागु जःखः च्वनीपिं मेपिं नेतात नं संघीयता तक हे माने मयाइपिं खः धासें प्रचण्ड उपिंलिसे मिले जूवंगु खँ नं वय्कलं कनादिल । वय्कलं धयादिल, ‘जिं ला माओवादी परित्याग याये न्ह्यः माओवादीयात रुपान्तरण याये नु धकाः प्रस्ताव खः, तर प्रचण्डं माओवादीयात रुपान्तरण यायेगु पलेसा विसर्जन हे यानादिल ।’

रुपान्तरण याःगु जूसा थौं माओवादीं ज्वनाच्वंगु मुद्दा ल्यनाच्वनीगु खः, आः विसर्जन हे जूगुलिं अज्याःगु अवस्था नं मदुगु खँ वय्कलं कनादिल । संघीयताया मोडल तयार यानागु इलय् थःपिंसं १० प्रदेशया मोडल स्वीकार याये नु धयाबलय् प्रचण्डं हे उकियात अस्वीकार याःगु द्वपं नं बियादिल । अथे खःसां आः दुगु ७ प्रदेशया आधारय् न्हुयाः मेगु बांलाःगु व्यवस्था याये माःगु बिचाः नं प्रकट यानादिल ।

जाति भाषाया मुद्दायात राजनीतिक पार्टीतय्सं त्वःता वन धाःसा थ्व कन्हय् अराजनीतिक रुपं पिहां वयेफुगु खतरा थम्हं खनागु दु धासें वय्कलं थुकियात इलय् हे सम्बोधन यानाः छगू समाधान पिकायेमाःगु बिचाः नं तयादिल । यदि थ्व मुद्दा सम्बोधन मजुल धाःसा देशं शान्ति व समृद्धिया गुगु म्हगस खंकाच्वंगु खः, व नं पूमवनीगु बिचाः तसें उकिया लागिं आः ‘स्वंगूगु ध्रुव’ या आवश्यकता जूगु बिचाः नं वय्कलं तयादिल ।

आः सम्बोधन याये मफुगु जाति भाषाया मुद्दा लगायत मेमेगु एजेण्डायात नं नापं तयाः आः स्वंगूगु मोर्चा आवश्यक खःसां आः उकिया बारे वैचारिक रुपं निं खँ न्ह्याकाच्वनागु व कन्हय् परिपक्व जुइकाः तयारी नं याना वनेगु ग्वसाः दुगु खँ नं कनादिल ।