खुसिबाः पनेत व व्यवस्थापनय् येँ महानगरया तयारी

येँ -येँ महानगरपालिकां खुसिबाःपाखें जुइफुगु सम्भावित विपद् पनेगु निंतिं पूर्वतयारी यायेकथं ज्या न्ह्याकूगु दु । येँ महानगरं मनसुन सक्रिय जूगुयालिसें खुसिबाः व थ्वपाखें जुइगु जोखिम पनेगु व व्यवस्थापनया ल्याखं पूर्वतयारी न्ह्याकूगु खः ।

येँ महानगरपालिकां महानगर जुयाः बाः वनीगु खुसिइ विगतया दँय् जूगु घटनाया अध्ययन व जोखिमयात ध्यानय् तयाः सम्भावित जोखिम व व्यवस्थापनया निंतिं पूर्वानुमान यानाः तयारी न्ह्याकूगु खः । विगतय् येँ महानगरया हिजाखुसि, अनामनगर, बःखु खुसि, सामाखुसि लगायतया क्षेत्र खुसिबालं अप्वः प्रभावित जुइगु खः ।

येँ महानगरपालिका विपद् व्यवस्थापन विभागया प्रमुख रविनमान श्रेष्ठं विगतया दँय् मनसुनया इलय् तसकं वा वयाः हिजाखुसिं अनामनगर, बःखु खुसिं बःखु, सामाखुसिं सामाखुसि लागाय् अप्वः समस्या जुयाच्वंगु धयादीगु दु । थ्व बाहेकं मेमेगु क्षेत्रय् नं समस्या जुयाच्वंगु धासें थुगुसी मनसुन सक्रिय जुयाच्वंगु अवस्था खुसि जःखःया लागाय् विशेष सावधानी नालेमाःगु आवश्यकतायात वाःचायेकाः पूर्वातयारी न्ह्याकागु धयादिल ।

थुुगसी अनामनगर, सामाखुसि थेंज्याःगु अप्वः समस्या जुइगु लागाय् सुचुकुचु व पूर्वाधारया निंतिं माग वःगु जानकारी बियादिसें वय्कलं अज्याःगु खुसिइ खुसि बाः वयेगु म्हो यायेगु निंतिं निर्वाध रुपं जलप्रवाह कायम यायेगु ज्या जूगु खँ कनादिल । सम्भावित विपद् व्यवस्थापनया निंतिं नेपाली सेना, नेपाल प्रहरी प सशस्त्र प्रहरीलिसे नं साझेदारी व समन्वय यायेगु तयारी जुयाच्वंगु नापं दमकलयात नं तयारी अवस्थाय् तयेगु ज्या जूगु दु ।

येँ महानगर दुनेया गुगुं नं थासय् खुसिबाः व मेगु छुं नं कथंया विपद् वःसा सम्बन्धित निकाय वा वय्कःयात व्यक्तिगत रुपं नं स्वापू तयेत इनाप यासें वय्कलं तत्काल थपिं विपद् व्यवस्थापनय् निंतिं परिचालन जुइगु जुइ धयादिल ।