किपू व ह्वाङकाङ दथुइ भगिनी सम्बन्ध

किपू (नेपालभाषा टाइम्स) – किपू नगरपालिका व चीनया ह्वाङकाङ शहर दथुइ भगिनी सम्बन्ध कायम जूगु दु। येँया दक्षिण भेगय् लाःगु किपू नगरपालिका व चीनया हुबेइ प्रान्तया ह्वाङकाङ शहर दथुइ जूगु सहलहया इलय् निगू नगर दथुइ भगिनी सम्बन्ध कायम यायेगु सहमति जूगु खः ।

उगु इलय् निगू नगरया दथुइ भगिनी सम्बन्ध कायम यायेगु ल्याखं जूगु सम्झौता पती किपू नगरपालिकाया प्रमुख महर्जन व ह्वाङकाङ नगरया उपप्रमुख डक बों ल्हाःचिं तयादीगु खः । निगुलिं पक्षं ल्हाःचिं तःगु दृश्य भर्चुअल माध्यमं सार्वजनिक याःगु खः । भर्चुअल माध्यमं न्ह्याःगु छलफलय् किपू नपा व ह्वाङकाङ नगर दथुइ सांस्कृतिक, शैक्षिक, पर्यटकीय, स्वास्थ्य व आर्थिक विकासया निंतिं थवंथवय् ग्वाहालि यायेगु ल्याखं उगु सम्बन्ध कायम याःगु खः ।