अप्वः यात्रु तइगु सवारीया जरिवाना अप्वयेकल

येँ – क्षमता स्वयां अप्वः यात्रु तइगु चीग्वःगु माइक्रोबस व स्वचाः घःचाः दुगु सवारी साधनया जरिवाना अप्वयेकूगु दु ।
गृहमन्त्रालयं वंगु जेठ ४ गते दुर्घटना म्हो यायेगु व ट्राफिक नियमया पालनाया निंतिं कडा रुपं न्ह्याः वनेत महानगरी ट्राफिक प्रहरी महाशाखायात निर्देशन बिउगु खः ।

उगु हे निर्देशन कथं सिट क्षमता स्वयां अप्वः यात्रु तःगु सवारी साधानयात ट्राफिक प्रहरीं न्यासः तका जरिवाना याना वयाच्वंगुलिं वंगु जेठ १२ गतेनिसें द्वःछि तका जरिवाना याःगु दु । महाशाखाया प्रमुख लिसें वरिष्ठ उपरीक्षक वसन्त पन्तं वंगु जेठ ४ गते निसें म्हिगः तक ६४९ माइक्रो व टेम्पोयात कारवाही यायेधुंगु जानकारी बियादीगु दु ।

यात्रुतय् थनाः यात्रा याकुगु १८ सिट स्वयां म्हो क्षमताया माइक्रो बस व टेम्पोयात कारबाही यानागु खँ नं वय्कलं कनादीगु दु ।
महाशाखाया प्रमुख पन्तया कथं यातायात विभागं न्हापा न्यासः तका जरिवाना याना वयाच्वंगु खःसा शनिवाः निसें द्वछि तक कायेगु कथं महाशाखायात अधिकार प्रत्यायोजन याःगु व वहे कथं जरिवाना कयागु खँ नं कनादीगु दु ।