गायक रोशनकुमार सम्मानित

ख्वप – ख्वपया नांजाःम्ह म्येँ हालामि व संगीतकार रोशनकुमार राजभण्डारी सम्मानित जुयादीगु दु । भक्तपुर सांगीतिक समाजया न्हापांगु वार्षिक साधारण सभाया झ्वलय् वय्कः सम्मानित जुयादीगु खः । ज्याझ्वःया मूपाहां नांजाःम्ह म्येँ हालामि प्रेमध्वज प्रधानं झिद्वः तका दां सहित हनापौ देछासें वय्कःयात सम्मान यानादीगु खः ।

विराट नेपालभाषा साहित्य सम्मेलन, नेपालभाषा साहित्य तःमुँज्या नापं इन्द्रेणी सांस्कृतिक समाजया ग्वसालय् जुइगु ज्याझ्वलय् आपालं म्येँ, लसकुस म्येँ च्वयाः, हाला, संगीतया ख्यलय् आपालं ग्वाहालि यानादीम्ह वय्कःयात ग्वाहालिकथं दां सिरपाः सहित हनेज्या याःगु खः ।

ज्याझ्वलय् मूपाहां वरिष्ठ गायक प्रेमध्वज प्रधानं वर्तमान इलय् न्हू न्हूगु व आधुनिक प्रविधिं म्येँ हालीपिंत तसकं अःपुका बिउगु खँ न्ह्यथनादिसें संगीतय् साधना तसकं महत्वपूर्ण पक्ष जूगु धयादिल ।समाजया निंतिं स्थानीय समाजसेवी शिवप्रसाद मुनंकःमिंं अक्षय कोषया निंतिं न्यय्द्वः तका ग्वाहालि यानादीगु ज्याझ्वलय् लोकगायक बुद्धिकृष्ण लामिछानेयात नं हनेज्या याःगु खः ।

वय्कःयात झिद्वः तका दां सहित सुशिल ढुंगेल साहित्य संगीत सम्मान लःल्हाःगु खः । उगु हे ज्याझ्वलय् विद्युतीय सामग्री ब्यवसायी रोशन भ्वय्द्यः व रुकेश रञ्जितं नं म्हतिं न्याद्वः न्याद्वः दां नं लःल्हानादीगु खः । उगु इलय् सांस्कृतिक ज्याझ्वः नं न्ह्यब्वःगु खः ।

सम्बन्धित बुखँ

LEAVE YOUR COMMENTS