फरार कैदीयात सरकारी सेवा मबीगु
येँ – सर्वोच्च अदालतपाखें दोषी ठहर याःसां नं बिसिउँ वनाच्वंगु कारणं कारवाही याये मफयाच्वंपिं मनूतय्त आः सरकारपाखें बीगु थीथी सेवां बञ्चित यायेगु अभियानयात तीव्र याइगु जूगु दु। अदालतं दोषी ठहर याःसां फरार जुयाच्वंपिं थज्याःपिं अपराधीतय्त मत, लः आदिया ध्यबा पुइके मबीगु, पासपोर्ट, लाइसेन्स आदि कायेमाःसा सिफारिस मयायेगु थेंज्याःगु सरकारी सेवां बञ्चित यायेगु ज्या देय्या २४ गू जिल्लाय् आः हे चालु जुयाच्वंगु दुसा आः थुकियात देशव्यापी यायेगु तयारी जूगु खँ धाःगु दु।थुकिया लागिं अदालतपाखें गृह मन्त्रालय, परराष्ट्र मन्त्रालयय् पत्राचार यानाः समन्वय यायेत्यंगु दु ।
सर्वोच्च अदालतं बिउगु तथ्यांक कथं थौंकन्हय् वंगु मंसिर महिना तक अदालतं दोषी ठहर याःसां नं सजाँय मफसे फरार जुयाच्वंपिं मनूतय् ल्याः १ लाख १६ हजार थ्यनाच्वंगु दु। थुकी १,५४६ म्ह विदेशी नागरिक नं दुथ्याः । थ्व फुक्क फरार मनूतपाखें आः तक १४ अर्ब ५ करोड तका बराबरया दण्ड जरिवाना पुइके मानिसा १ लाख ५६ हजार वर्ष कैद भुक्तान याये मानि ।
फरार मनूतय्त सरकारी सेवां बञ्चित यायेगु व उपिं गनं अज्याःगु सेवा काः वयाच्वंगु दुसा अन हे ज्वनेगु कथं न्ह्याकूगु अभियान गाक्कं प्रभावकारी जूगु खँ धाःगु दु। आः तक २४ गू जिल्लाय् थ्व अभियानं यानाः १४ करोड ३५ लाख ८ हजार तका दां असुल जूगु दुसा १५८ वर्ष ८ महिना कैद नं भुक्तान जूगु दु। थ्व अभियानपाखें फरार जुयाच्वंपिंत सजाँय भुक्तान यानाः उपिंपाखें पीडित जूपिंत राहत बीगु ज्या जुइगुया नापनापं न्हूपिंत नं न्ह्याक्व हे पुलांगु केश जूसां दण्डपाखें धाःसा सुं नं बचे जुइ फइ मखु धकाः सचेत यायेगु ज्या नं जुइगु खँ धाःगु दु। न्हूपिंत सजाँयपाखें बिसिउँ वने फइ मखु धइगु सन्देश जक प्रसार याये फःसां अपराध याइगु ज्याय् गाक्कं कमी वइगु खँ धाःगु दु ।
सर्वोच्च अदालतं थथे सजायँ ल्यंकेगु ज्यायात शून्यय् हयेगु लक्ष्य तयातःगु दु ।
LEAVE YOUR COMMENTS