सामुदायिक विद्यालयया विद्यार्थीतय् दथुइ गंल्वय्या अभिमुखीकरण ज्याझ्वः

ख्वप – नेपाल क्षयरोग निवारण संस्था ख्वपं विद्यालयया विद्यार्थीतय् दथुइ छगू अभिमुखीकरण ज्याझ्वः याःगु दु । संस्थां थुगु दँय् क्षयरोग जूपिं मात्तुमालाः उपचारया पहुँचय् हयेगु ल्याखं न्ह्याका वयाच्वंगु ज्याझ्वः अन्तर्गत शारादा माध्यमिक विद्यालयया विद्यार्थीतय् दथुइ उकथंया अभिमुखीकरण ज्याझ्वः याःगु खः ।

संस्थाया सभापति राम सिख्वःया सभापतित्वय् जूगु ज्याझ्वलय् विद्यार्थीतय्पाखें छेँखाछेँखापतिकं गंल्वचं कःपिं मालेगु ल्याखं उगु ज्याझ्वः न्ह्याकूगु खः । संस्थाया निवर्तमान सभापति बाबुकाजी श्रेष्ठं प्रशिक्षण बियादीगु ज्याझ्वलय् शारदा मा.वि.या पीम्ह स्वयां अप्वः विद्यार्थीतय् सहभागिता दुगु खः ।

ज्याझ्वलय् गंल्वचं कःपिं पत्ता लगे यायेगु निंतिं न्ह्यसःत तयार यानाः डाटा संकलन यायेगु ल्याखं ज्या जुयाच्वंगु संस्थाया कार्यालय सचिव हिरण्यप्रताप सांगामिं जानकारीइ बियादिल । अभियानया रुपय् न्ह्याका वयाच्वंगु उगु ज्याझ्वः अन्तर्गत आतक प्यंगू विद्यालयय् ज्याझ्वः संचालन यायेगु ज्या जुइधुंकूगु नापं इपिं स्कुलय् निःशुल्क खइ परीक्षणया शिविर नं न्ह्याके धुंगु संस्थाया सचिव राजेश्वरी शिल्पकारं कनादिल ।

अभियान फलदायी जूगु धासें थगुनेया तुलनातय् थुगुसी ख्वपय् गंल्वचं कःपिं ल्वगितय् ल्याः गाक्कं कुहां वंगु संस्थां न्ह्यथंगु दु । अथे खःसां अझं सुलाच्वंपिं ल्वगित दयेमाः धइगु आशंका यासें इमित पत्ता लगे याये ल्यं दुगु नापं इमित वासः यायेगु उद्देश्यं राष्ट्रिय क्षयरोग केन्द्र ख्वप व संस्थां मंकाःकथं पहल यानाच्वनागु सभापति सिख्वं जानकारी बियादिल ।