सुनां मसिउगु प्रतिभा

बलिउड अभिनेत्री श्रीदेवी आः थ्व संसारय् मदये धुंकल । बलिउडय् ‘चाँदनी’या नामं चर्चित श्रीदेवी थःगु इलय् छम्ह बांलाःम्ह फिल्म अभिनेत्रीया रुपय् जक सीमित मजू । व छम्ह बांलाःम्ह डान्सर नं खः । थ्व खँ यक्वसिनं सिउ । तर श्रीदेवीयाके छगू मेगु नं प्रतिभा दु, गुगु तसकं म्हो जक मनूतय्सं सिउ, व खः वयागु चित्रकारिता अर्थात पेन्टिंग ।

फिल्म उद्योगया छम्ह बांलाःम्ह कलाकारलिसें चित्र च्वयेगुलिइ नं उलि हे क्षमतावान धइगु खँ श्रीदेवी मदये धुंकाः हे जक थ्व रहस्य पिहां वःगु खः । श्रीदेवीया थ्व क्षमताया रहस्य नं अबलय् पिहां वःगु खः, गबलय् वया भाःत बोनी कपुरं श्रीदेवीं च्वःगु छपाः किपा (पेन्टिंग) वयागु ज्याकुथिइ तये हल ।

बोनी कपुरया हे फिल्मय् स्पटब्वाईया ज्या याइम्ह छम्ह मनुखं धाःकथं श्रीदेवीं थःगु पेन्टिंग मुम्बईलय् लिलामय् तयेगु नं योजना दयेकाच्वंगु खः । तर श्रीदेवी मदये धुंकाः वं च्वःगु दक्वं पेन्टिंग आः वयागु लुमन्तिकथं जक ल्यनाच्वनीगु जूगु दु । अय्नं श्रीदेवीया छपाः उत्कृष्ट पेन्टिंग धाःसा बोनी कपुरया ज्याकुथिइ खंके फइ ।