साल्ट ट्रेडिङ २५ प्रतिशत बोनस शेयर बीगु

येँ – साल्ट ट्रेडिङ कर्पोरेशनं आर्थिक दँ २०७३–७४ या नाफा पाखें २५ प्रतिशत बोनस शेयर व १० प्रतिशत नगद लाभांस बीगु जूगु दु । कर्पाेरेशनया म्हिगः क्वचाःगु ५१ औं साधारण सभां लांभास पारित याःगु खः । साधारण सभाय् वंगु आर्थिक दँय् ७६ करोड ९३ लाख नाफा कमे याःगु जानकारी नं बिउगु खः । थ्व थगुने स्वयां १५ करोड ६९ लाख तका अप्वः खः । साधारण सभाय् कर्पोरेशनया प्रमुख कार्यकारि अधिकृत उर्मिला श्रेष्ठं आः येँया लिसें मू मू शहरय् पेट्रोलियम पदार्थया कारोवारया निंतिं पम्प तयेगु, तू चिकं व तु उत्पादनय् लगानी यायेगु जानकारी बियादीगु खः ।

कर्पोरेशनं चालु आर्थिक दँय् झिगू अर्ब कारोवार यायेगु लक्ष्य तयातःगु दुसा वंगु माघ तकया दुने ६ अर्ब ६६ करोड तकाया कारोवार यायेधुंकूगु दु । थगुने थ्व अवधिइ ५ अर्ब ४१ करोडया कारोवार याःगु खः ।कर्पोरेशनं सरकारया अनुदानय् चालु आर्थिक दँय् मीगु निंतिं ५७ हजार मेट्रिक टन युरिया व २२ हजार टन डिएपी सा आयात यायेधुंकूगु दु । साधारण सभाय् न्ववानादिसें कर्पोरेशनया अध्यक्ष लक्ष्मीदास मानन्धरं वइगु इलय् नं आमउपभोक्तातय् निंतिं गुणस्तरीय खाद्यान्न व मेमेगु वस्तु सरल व सहज रुपं वितरण यायेगु खँ कनादिल ।