ज्ञानमाला रत्नवत सिरपाः लःल्हात
येँ – थुगुसीया ज्ञानमाला रत्नवत सिरपाः व गुलुपाः सिरपाः छगू ज्याझ्वःया दथुइ लःल्हाःगु दु । अथे हे बौद्ध धर्मया प्रचार प्रसारय् विशेष योगदान बियाबिज्याःगु धासें जितवन विहार, थक्वाःया भिक्षु थानसेट्ठ महास्थविरयात झिद्वः तका दांलिसें भगवान बुद्धया मूर्ति व हनापौ लःल्हाःगु खः ।ज्ञानमाला भजन खलः, स्वयम्भूपाखें आनन्दकुटी विद्यापीठय् जूगु ज्याझ्वलय् भजन च्वमि, लय्चिनामिनाापं नांजाःम्ह म्ये हालामि रत्न ‘बेहोसी’ वज्राचार्य व संस्थागतपाखे यलया युवक बौद्ध मण्डल, नेपालयात थुगुसीया ज्ञानमला रत्नवत सिरपाःकथं झिद्वः तका दांलिसें बुद्ध मूर्ति लःल्हाःगु खः । ज्याझ्वःया मूपाहां येँ महानगरपालिकाया प्रमुख विद्यासुन्दर शाक्यं पुरस्कृति व्यक्तित्वपिंत बुद्धमूर्ति लःल्हानादीगु खःसा ग्वसाः खलःया नायः तीर्थनारायण महर्जनं दां लःल्हानादीगु खः ।
स्वयम्भू ज्ञानमाला भजन खलःया तत्कालीन नायः रत्नबहादुर तण्डुकारं थः नाय जुयाच्वनादीगु इलय् २०५१ सालय् उगु सिरपाः नीस्वनादीगु खः । न्हापा दँय्दसं बीगु याना वयाच्वंगु थुगु सिरपाः वंगु छुं दँ न्ह्यवंनिसें निदँय् छकः बीगु याना वयाच्वंगु खः । उगु हे ज्याझ्वलय् विश्वशान्ति विहार न्हू बानेश्वरयात गुलुपाः सिरपाः नं लःल्हाःगु खः । ज्याझ्वलय् पुरस्कृत व्यक्तित्व नापं नांजाःम्ह म्येँ हालामि रत्न ‘बेहोसीं’ च्वयादीगु गीतिसंग्रह ‘फाटेको मन’या सपूm मूपाहां शाक्यं पितब्वज्या यानादीगु खः ।
अथे हे ज्याझ्वलय् प्रतिनिधिसभा सदस्यय् निर्वाचित जुयादीम्ह जीवनराम श्रेष्ठ व प्रदेशसभाय् निर्वाचित राजेश शाक्यनापं ज्ञानमाला भजन निरन्तररुपं न्ह्याकेत व स्वयम्भू ज्ञानमाला भजन खलःया मदिक्क ग्वाहालि यानादीपिं सल्लाहाकार दबलकाजी तुलाधर, युरीकाजी कंसाकार, प्रा. रत्नमान डंगोल, ब.अ. सर्वज्ञरत्न तुलाधर, डा. सुमित्रा मानन्धर, रत्नबहादुर राजकर्णिकार व पुण्य शाक्यपिंत नं हनेज्या याःगु खः ।
LEAVE YOUR COMMENTS