दक्षिण कोरियाया विश्वकप यात्रा क्वचाल

बेल्जियम व मेक्सिको नकआउटया लुखाखरुइ

येँ– मेक्सिकोलिसे २–० गोल पराजित जुइवं दक्षिण कोरियाया विश्वकप यात्रा क्वचाःगु दु । दक्षिण कोरिया लिग चरणया दकलय् लिपांगु कासा जर्मनीलिसे म्हिताः लिहां वनीगु जुइ ।

जाभिएर हर्नान्डेजं थःगु ५० औं अन्तर्राष्ट्रिय गोल यायेवं मेक्सिको दक्षिण कोरियायात पराजित यासें नकआउट चरणय् दुहां वंगु खः । कासाया ६६ औं मिनेटय् हर्नान्डेजं गोल याये न्ह्यः कार्लोस भेलां पेनाल्टिपाखें गोल यासें मेक्सिकोयात अग्रता बिउगु खः । कासाया् २६ औं मिनेटय् जङ ह्युन सुं बक्स दुने ह्याण्ड यायेवं पेनाल्टि बिउगु खः । दक्षिण कोरियाया निंतिं धाःसा सन ह्युगं मिनं इन्जुरी इलय् ९३ औं मिनेटय् छगू आकर्षक गोल यासें सान्त्वना बिल ।

न्हापांगु कासाय् जर्मनीयात स्तब्ध याःगु मेक्सिको थ्व विजय लिसें नकआउट चरणया लुखाय् थ्यंगु दु । शनिवाः लिबाक्क जुइगु कासाय् यदि स्वीडेनं नं जर्मनीयात बुकल धाःसा मेक्सिको झ्वःलाक्क न्हय्क्वःगु खुसी विश्वकपया अन्तिम झिंखुगूगुलिइ दुहां वनीगु जुइ ।

मेखे समूह ‘जी’ पाखें बेल्जियम नं नकआउट चरणया लुखाखरुइ थ्यंगु दु । रोमेलु लुकाकु व इडेन हाजार्डं निगू निगू गोल यायेवं बेल्जियमं शनिवाः जूगु न्हापांगु कासाय् ट्युनिसियायात ५–२ गोलं बुकूगु खः । बेल्जियमया निंतिं थप छगू गोल बात्सुयाइं याःगु खः ।
आइतवाः इंग्ल्यान्डं पानामायात बुकल धाःसा बेल्जियम इंग्ल्यान्ड लिसें निगूगु चरणय् दुहां वनीगु जुइ । थौंया निगू गोल लिसें लुकाकुया थ्व विश्वकपय् प्यंगू गोल यासें पोर्चुगलया रोनाल्डो लिसे बराबरीइ याःगु दु ।