परियत्ति विद्यार्थी दथुइ वक्तृत्वकला कासा

येँ – परियत्ति शिक्षा ब्वंकीगु स्वनिगःया च्यागू केन्द्रया विद्यार्थीतय् दथुइ छगू वक्तृत्वकला कासा जुल । युवा बौद्ध समूह, येँया ग्वसालय् जूगु थ्व स्वीक्वःगु वक्तृत्वकला कासा खः । कासाय् जगतसुन्दर परियत्ति केन्द्र, लखुतिर्थ, येँया रिजा महर्जन न्हाप जुयादीगु खःसा शाक्यसिंह परियत्ति व प्रौढ शिक्षालय यलया तिरिशा शाक्य लिउ व नकबहिल बौद्ध परियत्ति केन्द्रया पूर्णिमा शाक्य लियांलिउ जुयादीगु खः ।

वय्कःपिंसं मांअबु व अनात्म लक्षण सूत्रया महत्वयात कयाः थःपिनिगु प्रस्तुति बियादीगु खः । कासाय् विजयी जुयादीपिंत भिक्षु बोधिज्ञान व परियत्ति वक्तृत्वकला कासा संचालक समितिया प्रमुख संरक्षक मोतिलाल शिल्पकारं दसिपौ व दां सिरपाः लःल्हानादीगु खः । थ्व हे झ्वलय् स्वीछक्वःगु कासा ग्वसाः ग्वयेगु पाःब्व नं लःल्हाःगु खः ।

संचालक समितिया मुख्य संरक्षक शिल्पकारं आकिवंया कासा ग्वसाः ग्वयेगु निंतिं दीपावति बौद्ध परियत्ति केन्द्र गुइत त्वाः यलया केन्द्राध्यक्ष इन्द्रकुमारि शाक्ययात पाःब्व पौ लःल्हानादीगु खः । बुद्ध धर्मया अध्ययनय् अभिरुचि अप्वयेकगु नापं नेतृत्व विकास यायेगु ल्याखं परियत्तिया विद्यार्थीतय् दथुइ थुकथंया कासा वंगु गुदँ न्ह्यवंनिसें जुया वयाच्वंगु दु ।

थुगुसी जूगु कासाय् जयमंगल विहार यलया निर्मला ताम्राकार, वाइएमबिए परियत्ति केन्द्र यलया सुनिता शिल्पकार, श्रीबच्छ परियत्ति केन्द्र यलया हेरादेवी शाक्य, दीपंकर परियत्ति शिक्षालय यलया निश्चलराज शाक्य व करुणा बौद्ध परियत्ति केन्द्र मातातीर्थया सरला डंगोलं ब्वति कयादीगु खः ।