महाविर पुनं पिपिइ दयेकीगु

येँ – कोरोना भाइरस संक्रमणया उपचारया निंतिं खटे जुइपिं चिकित्सकतय् मदयेक मगाः पिपिइ (पर्सनल प्रोटेक्सन इक्विपमेन्ट) दयेकेगु निंतिं राष्ट्रिय आविष्कार केन्द्रया अन्वेषक महावीर पुनयात स्वीकृति बिउगु दु । पुनं दयेकूगु नमूना नेपाल मेडिकल काउन्सिलय् क्यने यंकूगु खः । थ्व नमूना काउन्सिलया अध्यक्ष डा. भगवान कोइरालां स्वयेधुंकाः स्वीकृति बिउगु खः ।

स्वीकृति लिपा आः पिपिइ दयेकेगु निंतिं येँया पेप्सीकोला व चप्पल कारखानाय् च्वंगु निगू गार्मेन्टय् अर्डर बीधुनागु खँ पुनं धाःगु दु । पुनं पिपिइ दयेकेत माःगु आवश्यक सामान फुक्कं गार्मेन्टय् यंके धुनागु खँ नं कनादीगु दु । वय्कःया कथं नेपाःया बजारय् थःम्ह माला हयागु सामानं आःयात न्यासःपाः जक पिपिइ सुइत गाइगु खँ नं धयादीगु दु ।

वय्कलं पिपिइ सुइत माःगु सामान नेपाःया बजारय् मालाबिइगु निंतिं उद्योग मन्त्रालययात नं इनाप यानादीधुंकूगु दु । सामान दत धाःसा माक्व पिपिइ नेपालय् हे उत्पादन यायेफइगु खँ वय्कलं धयादीगु दु ।

ने.सं. ११४० चौलाथ्व २ (चैत १३)