आः वइगु वैशाखं मरुसतः उलेज्या

सिँ हयेगु लागिं रौटहतय् सिमा पालीगु प्रतीक्षा

येँ (नेपालभाषा टाइम्स) – २०७२ साल वैशाख १२ गते ब्वःगु तःभुखाचय् पाःताः जुइक ध्वस्त जूगु ऐतिहासिक मरुसतः आः २०७८ सालया वैशाख १२ गते हे उलेज्या यायेगु तयारी शुरु जूगु दु । उकिया लागिं द्रुतगतिं ज्या जुयाच्वंगु खँ काष्ठमण्डप पुनर्निर्माण समितिया संयोजक लिसें बागमती प्रदेशया सांसद राजेश शाक्यं कनादीगु दु ।

संयोजक शाक्यं कनादीकथं मरुसतः पुनर्निर्माणया ज्या ७५ प्रतिशत क्वचायेधुंकूगु दु । आः च्वय्या भचा व क्वय् ‘ग्राउण्ड’ या भचा ज्या ल्यं दनि । थ्व ज्या न्ह्याकेत अझ नं मेगु सिँ हयेमाःगु दु। सिँ हये मफयाः ज्या थानाच्वंगु खँ वय्कलं कनादिल । नेपाःया वन सम्बन्धी नीतिया कारणं मरुसतःयात सिँ माल धायेवं जंगलय् वनाः सिमा पाले मजिउ । राष्ट्रिय महत्वया छुं ज्याखँया लागिं सिमा पालीबलय् वहे सिमाया सिँ हयेमाःगु जुयाः थःपिं पियाच्वनागु खँ वय्कलं कनादिल ।

नेपाल सरकारं दयेकाच्वंगु ४०० केभीया विद्युत प्रशारण लाइनया लागिं रौतहटय् सिमा पालेगु तयारी जुयाच्वंगु दु। अन सिमा पालेगु शुरु जुइवं वहे सिमाया सिँ हयेगु खँ वय्कलं कनादिल । थ्व स्वयां न्ह्यः नं रौतहटं हे सिँ हयागु खःसां उकिया कानुनी प्रक्रिया पूवंकेत धाःसा तसकं थाकुगु जुयाः छुं ई लिबाःगु खःसा आः नं अज्याःगु कानुनी झंझट भचा दनिगु खँ नं संयोजक शाक्यं कनादिल ।

मरुसतःया च्वय् जुयाच्वंगु ज्या क्वचायेवं अन गजू छुइगु ज्या जुइ । मरुसतःया पुलांगु गजू तसकं जीर्ण जूगुलिं न्हूगु हे गजू दयेकाः छुइगु तयारी जुयाच्वंगु दु । पुलांगु गजुली चुन पानातःगु जुयाः जीर्ण जुयाच्वंगु खनेदु । न्हूगु गजू दयेकेधुन कि पुलांगु गजूयात म्युजियमय् तये यंकेगु खँ नं संयोजक शाक्यं कनादिल । शाक्यं कनादी कथं मरुसतः पुनर्निर्माण लिपा अन लुयावःगु अवशेष व मरुसतः सम्बन्धी थीथी सामग्री सुरक्षित याना तयेगु लागिं छगू म्युजियम समेत दयेकेगु बिचाः जुयाच्वंगु दु । थ्व म्युजियम गन गय् यानाः दयेकेगु धइगु बारे स्पष्ट तयारी धाःसा मजूनि ।

मरुसतः पुनर्निर्माणया आः तक जुयाच्वंगु ज्या म्हीग शहरी विकास मन्त्री कृष्णगोपाल श्रेष्ठं निरीक्षण यानादीगु खः । अन पत्रकारतलिसे खँ ल्हासें मन्त्री श्रेष्ठं ७२ सालया वैशाख १२ गते क्वःदःगु मरुसतः आः ७८ सालया वैशाख १२ गते न्हिनसिया १२ बजे हे उलेज्या यायेगु कथं तयारी जुयाच्वंगु जानकारी बियादीगु खः ।

सम्बन्धित बुखँ

LEAVE YOUR COMMENTS