फुटबल कासामिं निगू लाख कमे यायेफइ : शेर्पा

अखिल नेपाल फुटबल संघ (एन्फां) देय्या न्हय्गुलिं प्रदेशय् फुटबल प्रतिष्ठान स्थापना याइगु जूगु दु । एन्फाया नवनिर्वाचित अध्यक्ष कर्मा छिरिङ शेर्पां न्हय्गुलिं प्रदेशय् फुटबल प्रतिष्ठान चायेकेगु खँ धयादीगु खः । लिसें वय्कलं न्हय्गुलिं प्रदेशय् झिंप्यंगू प्रतिष्ठान स्थापनाया निंतिं गृहकार्य शुरु यायेगु नं धयादीगु दु ।

एन्फाया नवनियुक्त अध्यक्ष शेर्पां फुटबल कासायात व्यावसायिक रुपं हे विकास यायेत देय्न्यंकं जनशक्ति उत्पादन यायेत उकथं प्रतिष्ठान चायेकेगु जुइ धासें क्वय्या स्तरं हे कासाया वातावरण निर्माण यायेत एन्फाया बैठकं पीन्यागू जिल्लाय् तत्कालया निंतिं कासा प्रशिक्षण केन्द्र चायेकेगु व ताःई न्ह्यवंनिसें दिनाच्वंगु लिग कासा नं संचालन यायेगु धयादीगु दु ।

फुटबल कासाय् खने दुगु ‘म्याच फिक्सिंग’ दिकेत तत्काल कानुनया आवश्यक दुगु धासें वय्कलं धयादिल, ‘म्याच फिक्सिंगया अन्त्य यायेत तत्काल कानुनया आवश्यक दु, उगु कानुन हयेत सरोकारवाला निकाय, सरकार व संसदं नं विशेष पहल यायेमाः ।’

अध्यक्ष शेर्पां अनुशासन कमिटी व अपिल कमिटी गठन यानाः कासाय् दयाच्वंगु सकतांकथंया मिलेमतो व अनियमितता पनेगु विश्वास प्वंकुसे वय्कलं धयादिल, ‘जिमिसं सकलें कासामिया गतिविधियात ध्यानय् तयेगु जुइ, सुयात नाप लाइ, छु याइ ? उकिया बारे नं जानकारी कायेगु जुइ ।’

थौंकन्हय् थीथी कासाय् नं म्याच फिक्सिंग जुइगु याना वयाच्वंगु व उकियात पनेत विश्व फुटबलया सर्वोच्च निकाय फिफां सफ्टवेयर तकं दयेके धुंकूगु जानकारी बियादिसें वय्कलं धयादिल, ‘सफ्टवेयरपाखें स्वाभाविक व अस्वाभाविक कासा पत्ता लगे याये फइ, थ्व प्रविधिपाखें थःपिं आः न्ह्याः वनेगु जुइ ।’

लिपांगु इलय् फुटबल कासाय् म्याच फिक्सिंग जुइगु द्वपं लानाच्वंगु धासें वय्कलं फुटबलय् नीतिगत पारदर्शीता दयेमाः धइगु खँय् न्हूगु नेतृत्व केन्द्रीत जुइगु नं धयादीगु दु । उकिया निंतिं विज्ञतलिसें सहलह यानाः उपयुक्त नीति दयेकेगु जानकारी बियादिसें एन्फाय् खने दुगु अनियमितता पनेत आर्थिक नियमावली जारी यानाः पारदर्शीता कायम यायेगु वय्कःया धापू दु ।

अध्यक्ष शेर्पां फुटबल प्रशासनयात सूचना प्रविधिइ यंकेगु विश्वास प्वंकादिसें क्लब दर्ता यायेगुनिसें कयाः कासामि दर्ता यायेगु ज्यातकं आः अनलाइनपाखें यायेगु व इमिसं क्लब परिवर्तन याइगु इलय् नं अनलाइनपाखें याये फइगु व्यवस्था यायेगु बारे नं जानकारी बियादीगु दु ।

नेपाली फुटबलया विकासया निंतिं क्लबयात नं आर्थिक व भौतिक रुपं समृद्ध याना यंकेगु थःगु लक्ष्य दुगु जानकारी बियादिसें आः विदाया दिनय् नं स्तरीय लिग कासा यायेगु तयारीइ थः वनाच्वनागु दु धयादिल । अध्यक्ष शेर्पां नेपाली कासामिं अझ नं लछिया छगूत्या लाख निसें निगू लाख तक कमे याये फइगु अवस्था दुगु नं धयादीगु दु ।