प्रधानमन्त्रीया सल्लाहकार हेरफेर

येँ – प्रधानमन्त्री केपी ओलीं वंगु छुं ई न्ह्यवंनिसें यानाच्वंगु थीथी कथंया तःधंगु निर्णयत मध्ये छगू थःपिनि सल्लाहकारतय् हिलाबुला नं खः । थ्व झ्वलय् वय्कलं थः मुख्य राजनीतिक सल्लाहकार बिष्णु रिमाल लगायत च्याम्ह सल्लाहकारतय्गु राजीनामा कायेगु निर्णय यानादीगु खः ।

वय्कलं बिष्णु रिमालया राजीनामा कयाः ५ नम्बर प्रदेशया मुख्यमन्त्री शंकर पोखरेलयात राजधानी झिके यानाः मुख्य सल्लाहकार दयेकेगु बिचाः यानादीगु खँ पिहां वःगु दु । तर मुख्यमन्त्री पोखरेलं थः राजधानी वयाः प्रधानमन्त्रीया सल्लाहकार जुइगु इच्छा धाःसा यानामदीगु खँ सीदुगु दु ।

मुख्यमन्त्री पोखरेलं सामाजिक सञ्जाल मार्फत छगू सन्देश बिसें प्रधानमन्त्रीपाखें थःत मुख्य राजनीतिक सल्लाहकार नियुक्त याइ धकाः पिहां वःगु खँ हल्ला जक साबित जुइ धकाः कामना यानागु खँ धयादीगु दु ।पोखरेलं मुख्य सल्लाहकार जुइगु इच्छा मयाःगु कारणं जुइमाः, प्रम ओलीं बिष्णु रिमालया राजीनामा स्थगित याइगु जूगु दु ।

वय्कलं थम्हं राजीनामा बिउ धकाः निर्देशन बियादीपिं च्याम्ह मध्ये प्यम्हेसिया जक राजीनामा स्वीकृत यायेफुगु खँ धाःगु दु । वय्कलं प्रेस सल्लाहकार कुन्दन अर्यालया राजीनामा नं स्वीकृत यानादीफुगु खँ सूत्रं धाःगु दु ।

प्रम ओलीं सरकारया मन्त्रीतय् नापनापं थः सल्लाहकारत समेत हिलाबुला यानादीत्यंगुलिं वय्कः न्हूगु हे टीम दयेकाः न्ह्याः वनेगु तयारीपाखे लगे जुयाच्वंगु अनुमान याःगु दु । मेखे प्रम ओलीं सल्लाहकारत हिलाबुला यायेत्यंगु सन्दर्भय् वय्कःलिसे सतिकः वनेगु लागिं पार्टी दुने मेगु तानातान शुरु जूगु खँ नं धयाहःगु दु ।