डा. देवकोटा मन्त, मंगलवाः अन्त्येष्टि, न्हयन्हुं काजक्रिया क्वचायेकीगु

येँ – वरिष्ठ न्यूरोसर्जन डा. उपेन्द्र देवकोटा थौं सनिलय् मन्त । ताःई न्ह्यव निसें विरामी जुयाच्वंम्ह वय्कः बासँबारीइ च्वंगु नेशनल इन्ष्टिच्यूट अफ न्यूरालोजिकल एण्ड एलाइड साइन्सेस अस्पतालय् मदुगु खः । थ्व अस्पतालय् वय्कलं हे चायेदीगु अस्पताल खः ।

खाइप्वःचिया क्यान्सरया कारणं वय्कः दछि न्ह्यवनिसें उपचार याका वयाच्वनादीम्ह खः । खुला न्ह्यव बेलायतय् वासः याकः झाःगु खःसां अन नं उपचार जुइमफइगु जुइवं वय्कः नेपाः लिहां झाःगु खः । वय्कः थौं सनिलय् ५ः३५ बजे मदुगु खः अस्पतालं छगू विज्ञप्ति पितबिसें धाःगु दु ।
वय्कःयात श्रद्धाञ्जली देछायेगु निंतिं मंगलवाः सुथय् ८ बजे निसें १ बजे तक अस्पताल परिसरय् हे तइगु व न्हिनय् २ बजे अन्त्येष्टिया निंतिं पशुपति यंकीगु खँ धाःगु दु । पशुपतिइ विद्युतीय दीपय् तयाः च्याकीगु खँ धाःगु दु ।

गोरखाया पण्डितगाउँ लिगलिगय् वि.सं. २०१० पुष ४ गते बूम्ह डा. देवकोटाया जहान व स्वम्ह म्हयाय्पिं दी । वय्कः थः मदये न्ह्यः थः बूगु छेँय् वनेगु व बूगु थाय् गोरखाया सिस्नेधाराया लः त्वनेगु इच्छा यानादीकथं वय्कःयात अन नं यंकाहःगु खः ।

वयकः मदयेधुंकाः वय्कःया क्रियाकर्म न्हयन्हुया दिने सिधयेकेगु खँ वय्कःया छेँजःपिंसं धाःगु दु । अस्पतालं पित बिउगु वक्तव्यय् वयकःया जहान डा. मधु दीक्षित, म्ह्याय्पिं मेघा, वसुधा व मञ्जरीं वय्कःया काजक्रिया न्हयन्हुया दुने क्वचायेकेगु धाःगु खँ न्ह्यथनातःगु दु ।

वयकःयात श्रद्धाञ्जली देछायेगु निंतिं थौं हे प्रधानमन्त्री केपी ओली अस्पताल झायादीगु खः ।