झिंनिदँ लिपा स्वनिगलय् च्वापु

येँ – स्वनिगलय् म्हिगः सुथय् च्वापु गाःगु दु । स्वनिगःया ख्वप, भ्वँत, येँया भुइजःसि लगायत थीथी थासय् च्वापु गाःगु खः । म्हिगः सुथय् ख्वपया नगरकोट, चाँगुनारायाण, सुडाल, ताथली, चित्तपोल, नंखेल सिपाडो, नलिन्चोक, गुण्डु, रानीकोट, घ्याम्पेडाँडा लागाय् च्वापु गाःगु खः । अथेहे सूर्यविनायक व थिमि लागाय् नं च्वापु गाःगु खः ।

च्वापुं यानाः नगरकोट लगायत थीथी थासय् यातायात नं अवरुद्ध जू वन । लिसें स्वनिगःया जःखः च्वंगु थीथी डाँडाय् नं च्वापु गाःगुलिं अन चाःहिउ वंपिनि चाप अप्वल । म्हिगः सार्वजनिक बिदा नं जूगुलिं चन्द्रागिरी, फूच्व, धिनाच्वय् च्वापुइ म्हितः वनीपिनि भीड हे खाःगु खः । स्वनिगलय् भिंmनिदँ लिपा थुकथं च्वापु गाःगु खः । थ्व स्वयां न्ह्यः २०६३ सालया फागुनय् स्वनिगलय् च्वापु गाःगु खः ।

म्हिगः चन्द्रागिरीइ च्वापुइ म्हितः वंपिनिगु रेकर्ड कायम जूगु खँ धाःगु दु । थ्व स्वयां न्ह्यः न्हिछिया दुने १५ हजार म्ह तक मनू अन वःगु रेकर्ड दुगु खःसा म्हिगः व स्वयां नं अप्वः थ्यंगु खँ चन्द्रागिरी हिल्सया प्रबन्ध निर्देशक अभिषेक प्रताप शाहं कनादीगु दु । अन केवलकारय् च्वनेगु लागिं झ्वः छुनाच्वंपिनि लाइन निगू किलोमिटर तक ताःहाकः जूगु खः । अथेहे च्वापु गायाः म्हिगः त्रिभुवन राजपथया यातायात सवारी साधन नं ठप्प जूगु खः ।

सम्बन्धित बुखँ

LEAVE YOUR COMMENTS