चुडामणि शर्माया छेँय् माओवादीया तोडफोड

येँ – विप्लव माओवादीं म्हिगः भ्रष्टाचारी धकाः मुद्दा चले जुयाच्वंम्ह आन्तरिक राजस्व विभागया पुलांम्ह महानिर्देशक चुडामणि शर्माया छेँय् तोडफोड यात । उमिसं शर्माया छेँया मूलुखाय् हाकुगु ब्यानर खानाः भ्रष्टाचार यानाः कमे यानातःगु उगु छेँ राष्ट्रियकरण यायेमाः धकाः समेत च्वयाः तिका थकूगु खः । शर्माया छेँ तोडफोड याः वंपिं माओवादी कार्यकर्तातय्सं सुरुइ छेँ म्हमसियाः चन्द्रसिंह तुलाधरया छेँय् तोडफोड याःगु जुयाच्वन । लिपा मखुगु छेँय् तोडफोड यात धइगु सीवं शर्माया छेँ ताके याःगु खः । प्रहरीं छेँ तोडफोड याःगु द्वपनय् म्हिगः हे २८ म्ह मिजं व १४ म्ह मिसा यानाः ४२ म्ह माओवादी कार्यकर्ता ज्वंगु दु ।