सन्नी लियोनीया नं बायोपिक

छगू लिपा मेगु ‘बायोपिक’ फिल्म निर्माण याना वयाच्वंगु बलिउड फिल्म उद्योगय् हाकनं मेगु छगू बायोपिक फिल्म निर्माण जुइगु जूगु दु । छुं ई न्ह्यः जक बलिउड नायक संजय दत्तया जीवनीया लिधंसाय् ‘सन्जु’ नांया बायोपिक फिल्म निर्माण यानाः प्रदर्शनय् वःगु खः । संकिपाया बजाः नं तसकं बांलाःगु समाचार वयाच्वंगु दु । आः वयाः हाकनं मेम्ह छम्ह कलाकारया जीवनीइ आधारित फिल्म दयेकूगु दु ।

पूर्व पोर्नस्टार नापं बलिउड अभिनेत्री सन्नी लियोनीया जीवनीइ आधारित जुयाः दयेकूगु ‘करनजीत कौर ः द अनटोल्ड स्टोरी अफ सन्नी लियोनी’या ट्रेलर सार्वजनिक जूगु दु । ट्रेलरय् करनजीत कौर नांया छम्ह साधारण मिसा सन्नी लियोनी जुइत संघर्ष यानाच्वंगु क्यनातःगु दु । ट्रेलर जक स्वयाः नं स्वकुमिपिंसं अज्याःगु आपालं खँ सीके फइ, गुगु सन्नीया बारे थ्व स्वयां न्ह्यः गबलें न्यंगु तकं मदु ।

‘थ्व बायोपिक संकिपा शुटिंग यायेत उलि अःपु मजुल । छाय्कि शुटिंगया इलय् जिं न्ह्याबलें ख्वयेगु खः’, थःगु जीवनीयात कयाः दयेकूगु संकिपा बारे सन्नीया धापू दु, ‘जिगु जीवनया पुलांगु पाना पुइका वंलिसे जितः दुःखं भुं वइगु खः । जिगु छेँजःया हे सदस्यपिनिगु मृत्यु थेंज्याःगु खँ नं आपालं दु, गुगु जिं थन बयान याये मफु ।’

सन्नीया जीवनीइ आधारित थुगु संकिपां नं बांलाक हे व्यापार याइगु विश्वास यानातःगु दु । तर उकिया निंतिं फिल्म प्रदर्शनय् वयेमानि ।