पृथ्वी जयन्तीया विरोधय् थीथी ज्याझ्वः

येँ – सरकारं पुस २७ गते पृथ्वी जयन्तीया न्हिकुन्हु सार्वजनिक विदा बिउगु विरोधय् म्हिगः थनया असनय् छगू विरोध प्रदर्शन जुल । नेवाः जागरण मंचया ग्वसालय् ब्यानर व प्लेकार्ड सहित विरोध प्रदर्शन याःगु खः ।
‘पृथ्वीनारायण शाहं नेपाः एकीकरण याःगु मखु, राज्य विस्तार जक याःगु खः’, ‘गणतन्त्र नेपालय् जुजु पृथ्वीनारायण शाहया नामं बिउगु विदाया विरोध यायेनु’, ‘पृथ्वीनारायण युद्ध अपराधी खः, एकताया प्रतीक मखु’ धइगु थीथी नारा च्वयातःगु ब्यानर व प्लेकार्ड सहित उकथं विरोध प्रदर्शन याःगु खः ।
०६३ सालया जनआन्दोलन लिपा देशय् गणतन्त्र वये धुंकाः पृथ्वी जयन्तीया विदा बीगु बन्द याये धुंकूगु खःसा आः वयाः हाकनं सरकारं उकथं सार्वजनिक विदा बिउगु धासें मंचया ग्वसालय् उकथं ब्यानर व प्लेकार्डलिसें विरोध प्रदर्शन याःगु खः ।
असनय् जूगु विरोधय् सभाय् नवासें नेवाः न्ह्यलुवा मल्ल के. सुन्दरं देशय् गणतन्त्र वये धुंकाः विदा बीगु बन्द याये धुंकूगु पृथ्वी जयन्ती कुन्हु हाकनं प्रधानमन्त्री शेरबहादुर देउवां सार्वजनिक विदा बीगु निर्णय याःगु धाथें छगू हास्यास्पद व लज्जास्पदया खँ खः धयादिल । शाह वंशीय शासन शुरु जूगु इलंनिसें हे देशय् भाषिक दमन नं शुरु जूगु खँ न्ह्यथँसें वय्कलं धयादिल, ‘शाह वंशीय शासनसत्ता जनताया हितया निंतिं मखु, थ्व मात्र थः सत्ताय् प्यपुनाच्वनेगु निंतिं खः ।’
ज्याझ्वलय् नेवाः जागरण मंचया नायः सुजीव वज्राचार्य, उमेश स्थापित, नेपाः युथ अर्गनाइजेसनया सुमन साय्मि व श्याम प्रजापति लगायतं नं पृथ्वी जयन्तीकुन्हु सार्वजनिक विदा बिउगु विरोधय् थःगु नुगःखँ तयादीगु खः ।
थ्व हे झ्वलय् पृथ्वी जयन्तीया हे लसताय् सरकारं सार्वजनिक विदा बिउगु विरोधय् म्हिगः नेपाः युथ अर्गानाइजेसनं नं छगू विरोधया ज्याझ्वः यात । अर्गनाइजेसनया आह्वानय् असनय् हे मुनाः छगू मोटरसाइकल ¥याली पिथंसे किपुलिइ वनाः अन च्वंगु छ्याकः ल्वहंतय् थ्यंकाः विरोध ज्याझ्वः याःगु खः ।
जागरण मंचया ग्वसालय् असनय् जूगु विरोध प्रदर्शन लिपा मोटरसाइकल ¥याली किपूया छ्याकः ल्वहंतय् वनाः अन नं विरोध प्रदर्शन याःगु खः । युथ अर्गनाइजेसनया ग्वसालय् असनं न्ह्याःगु विरोध मोटरसाइकल ¥याली किपुलिइ थ्यंकाः नेवाः प्रदेशय् आदिवासी जनजाति जागरण अभियानया ग्वसालय् छ्याकः ल्वहंतय् जूगु सभाय् सहभागि जूगु खः । लिसें विरोधकथं सहभागितय्सं छ्याकः ल्वहंतय् थुकलं बीगु ज्या नं याःगु खः ।
थुकथं देशय् गणतन्त्र वये धुंकाः सरकारं पृथ्वी जयन्ती व राष्ट्रिय एकता दिवसया नामय् बिदा बिउगु धासें किपूया स्थानीय जनता व अभियानं पृथ्वीनारायण शाहया पुतला तकं च्याकूगु खः । छ्याकः ल्वहंतय् जूगु औपचारिक ज्याझ्वः लिपा पृथ्वीनारयणया पुतला च्याकूगु खः ।
पृथ्वीनारायण शाहं किपू देय् त्याके धुंकाः नं लिपा किपूमितप्रति दमन, अन्याय व अत्याचार लिसें क्रुर व्यवहार याःगु विरोध स्वरुप उकथं छ्याकः ल्वहंतय् थुकलं बीगु परम्परा न्ह्याका वयाच्वंगु खः ।