नेकपा विवाद बारे आयोगं ज्या न्ह्याकलं

येँ (नेपालभाषा टाइम्स) – निर्वाचन आयोगं नेकपा विवादया समाधान मालेगु लागिं प्रक्रिया शुरु याःगु दु । निर्वाचन आयोगय् नेकपा धइगु आधिकारिक पार्टी व चुनाव चिं सुयात बीगु धइगु विवाद प्रवेश जूगु खः । थुकिया बारे आः तक आयोगं छुं प्रक्रिया शुरु याःगु मदुनिसा आः ज्या न्ह्याकेत्यंगु खः ।

पार्टीया चुनाव चिं ‘सुर्द्यः’ थःपिनिगु हे खः धकाः निगुलिं पार्टीं दावी यानाच्वंसां आः तक ओली पक्षं आयोगय् औपचारिक पौ च्वयाः माग धाःसा याःगु मदुनि । प्रधानमन्त्री लिसें पार्टी अध्यक्ष केपी ओलीं पार्टी व चुनाव चिं निगुलिं थःपिनिगु हे जूगु कारणं ‘थःगु सामान थःगु हे खः’ धकाः दावी याः वनेम्वाःगु खँ धयादीगु दु । उखे निर्वाचन आयोगं धाःसा ३५ न्हु तक नं यदि चुनाव चिंयात कयाः सुना नं दावी मयात धाःसा उगु चिं स्वतः हे बहुमत पक्षय् वनी धायेधुंकूगु दु ।

उगु बहुमत धइगु निर्वाचन आयोगय् पार्टी विभाजन न्ह्यः दर्ता यानातःगु केन्द्रीय दुजःतय् नांधलःया आधारय् क्वःछीगु खँ नं धाःगु दु । पार्टी विभाजन न्ह्यः निर्वाचन आयोगय् दर्ता यानातःगु केन्द्रीय दुजःया बहुमत थौंकन्हय् माधव नेपालया पक्षय् दु ।