येँ मनपा २७ वडाय् निःशुल्क मिखा शिविर

येँ – महिला जनचेतना समाज व दृष्टि द भिजनया मंकाः ग्वसालय् वंगु शनिवाः छन्हुया निःशुल्क मिखा शिविर ज्याझ्वः जुल । येँ महानगरपालिका २७ वडाया पिगंचुकय् जूगु शिविरय् स्वसः स्वयां अप्वःसिनं मिखाया परीक्षण याकूगु खः । येँ मनपा २७ वडाअध्यक्ष चिनियामान वज्राचार्य मूपाहांकथं झायादीगु ज्याझ्वलय् नवासें वय्कलं थुकथंया सामाजिक ज्याय् स्थानीय सरकार न्ह्याबलें न्ह्यचिला च्वनी धासें माःथाय् माःकथं ग्वाहालि यायेगु बचं बियादिल ।

दृष्टि द भिजनया कजि डा. रोहित सैंजूं मिखा परीक्षण यायेगु नापं निःशुल्क वासः वितरण यानादीगु खः । विशेष पाहां जुयादीम्ह वय्कलं शिविरय् मिखा परीक्षण यानादीमध्ये मोतिविन्दु जूपिंत लिपा ५० प्रतिशत छ्यापं बियाः शल्यक्रिया यायेगु जानकारी बियादिल ।

समाजया नायः भवानी भट्टराईया सभापतित्वय् छ्याञ्जे श्रृजना महर्जनं लसकुस यानादीगु ज्याझ्वलय् सल्लाहकार रोशन तुलाधरं नं नुगःखँ तयादीगु खः । समाजया हे ग्वसालय् म्हिगः ज्ञानमाला भजन न्ह्यब्वयेगु ज्या नं जुल । स्वयम्भू ज्ञानमाला भजन खलःपाखें ज्ञानमाला भजन न्ह्यब्वःगु खः ।