मिलानं युभेन्ट्सयात बुकल

मिलान (एजेन्सी) – एसी मिलानं इटालीया सिरी ए य् मंगलवा: अजुचायापूगु पुर्नआगमन यासें युभेन्ट्सयात ४-२ बुकल । लिग धलखय् दकलय् च्वये च्वना च्वंगु युभेन्ट्स छगू इलय् निगू गोलं न्ह्यने लाना च्वंगु ख: । तर निगूगु हाफया न्यागु मिनेट दुने मिलानं स्वंगु गोल या:गु ख: । युभेन्ट्सया नितिं सुरुआतय् एडरिन राबिट व क्रिस्टियानो रोनाल्डों गोल या:गु ख: ।

ज्लाटन इब्राहिमोभिचं मिलानया नितिं गोल यायेवं टिमया पुर्नआगमन न्ह्या:गु ख: । वया नितिं फ्रायन्क केसीं बराबरी गोल यात धा:सा राफेल लियोओ व एन्टे राबेचं गोल यात ।

मंगलवा:या मेगु कासाय् निगूगु थासय् च्वंगु लाजियो नं लेचेया ल्हातं २-१ बुत ।

इंग्ल्यान्ड
लन्डन – चेल्सीं इंग्लिस प्रिमियर लिगय् क्रिस्टल प्यालेसयात ३-२ बुकाः ल्याः धलखय् स्वंगूगु थाय् काःगु दु । चेल्सीया नितिं ओलिभर जिरोड, क्रिस्टियन पुलिसिच व टामी अब्राहमं गोल यात । चेल्सीया आः ६० ल्याः जूगु दु ।

थ्वया न्ह्यः स्वंगूगु थासय् लाना च्वंगु लेस्टरं धाःसा आर्सनलनाप १-० या बराबरी म्हितल । कासा क्वचाये खूगु मिनेट न्ह्यः लेस्टरया नितिं जेमी भार्डी बराबरी गोल याःगु खः ।