तब्या याःगु रिङरोड यात्रुतय् निंतिं खतरा
येँ – थौंकन्हय् लँ तब्या यानाच्वंगु रिङरोड यात्रु व चाकलतय् निंतिं तसकं असुरक्षित जूगु खँ धाःगु दु । चिनिया सरकारया ग्वाहालिं रिङरोड तब्या यायेगु ज्या ९० प्रतिशत क्वचायेधुंकूगु दु । च्यादँ न्ह्यव स्वीकृति जूगु डिजाइन कथं लँ तब्या याःबलय् यात्रु व चालकतय् ज्यानया निंतिं हे खतरा खनेदुगु खँ विज्ञतय्सं धयाहःगु खः ।
रिङरोडया थ्यंमथ्यं झिगू किलोमिटर कलंकि निसें कोटेश्वरतकया लँ तब्या यायेगु ज्या ९० प्रतिशत क्वचायेधुंकूगु अवस्था आः पुलांगु डिजाइनयात सुधार यानाः दयेके फइगु अवस्था नं मदुगु खँ सडक विभागया अधिकारीतय्सं धाःगु दु ।आः तब्या याःगु लँ तग्वःगु व तीव्र गतिं चले जुइगु गाडीया निंतिं जक उपयुक्त जूगु खँ विज्ञतय् धापू दु ।
सडक सुरक्षाया ल्याखं पैदलयात्री व निचाः घःचाःया सवारीया निंतिं धाःसा ज्यालगे हे मजूगु उमिगु दावी दु ।सडक यातायात सुरक्षाविद् आशिष गजुरेलं बिबिसी लिसे खँ ल्हासें लँ तब्याः याःबलय्या डिजाइनय् हे समस्या दुगु धासें थुकिं यानाः रिङरोड तसकं हे असुरक्षित जूगु व दुर्घटना जुइगु सम्भावना तसकं अप्वइगु खँ धयादीगु दु ।
चिनिया सरकारया प्यंगूत्या अर्ब तका अनुदानं तब्या यानाच्वंगु ज्या धाःसा क्वःछिनातःगु इलय् हे पूवनीगु खँ धाःगु दु । चीनया सांघाइ कन्स्ट्रक्सनं २०७१ य् सुरु याःगु थ्व ज्या तःक्वः हे म्याद थप यानाः दयेके ज्या न्ह्याकूगु खः । थ्व दथुइ हे विज्ञतय्सं तःक्वः हे थ्व सडकया डिजाइनयात कयाः न्ह्यसः थनाच्वंगु खःसा सडक विभागं डिजाइन सुधार यायेगु आश्वासन बियाच्वंगु खः ।
तर विभागं डिजाइनय् सुधार मयासे पुलांगु हे डिजाइनं दयेकूबलय् यात्रु व चालकतय् सुरक्षा खतराय् लाःवंगु दु । दकलय् स्यंगु धयागु तब्या याःगु सडकया दथुइ डिभाइडर धयागु हे मखु । नेपाः थेंज्याःगु लेन अनुशासनयात वास्ता मयासे गाडी गइपिनिगु निंतिं थ्व तसकं हे जोखिमपूर्ण खः ।
सडक विभागया वैदेशिक सहायता समन्वय अधिकारी सञ्जकुमार श्रेष्ठं लेन अनुशासनय् कडाइ यात धाःसा जोखिम मजुइगु खँ धयादीगु दु । वय्कलं बिबिसीयात धयादीगु दु, ‘डिजाइन गुकथं याःगु खः, उकथं हे स्तरोन्नतिया ज्या जूगु दु । दथुइ निबाला तुयुगु ध्वः तयेगु जुइ । सहरी क्षेत्रय् सडकय् थज्याःगु हे ध्वः जक तयाः लेन छुटे यायेगु चलन दु । थ्व ध्वलं पार यानाः वने दइमखु ।
तर झीगु देशय् सडक प्रयोगकर्तातय्सं थज्याःगु खँ मथू ।’ आयोजना प्रमुख प्रकाश भण्डारीं नं सरकारं स्वीकृत याःगु डिजाइनय् हे लँ दयेकागु धासे खसी बजाः, बल्खु, बागमती खुसि व मनोहरा खुसिपाखे सतकया निखेरं यानाः च्यापु ताँ व झिपु आकाशे ताँ मध्य स्वपु दयेकेधुनागु खँ धयादीगु दु ।
अथेहे वय्कलं कलंकीया अन्डरपास लिसें मेगु आकाशे ताँ दयेकेगु ज्या नं इलय् हे क्वचाइगु खँ धयादीगु दु । कलंकी खसिबजाः लिक्कसंया गाः ल्हायेगु ज्या श्रावणं क्वचाइगु खँ धाःगु दु । आः तब्या यानाच्वंगु झिगू किलोमिटर लँ मध्ये आः छगू किलोमिटर लँय् जक अलकत्रा तयेमानिगु खँ आयोजनां धाःगु दु ।
LEAVE YOUR COMMENTS