जातीय लिधंसाय् आरक्षण खारेज
येँ – देय्या लिउने लानाच्वंगु थीथी जाति व समुदाययात संविधान कथं बियादीगु आरक्षणयात सर्वोच्च अदालतं खारेज याना बिउगु दु । सर्वोच्च अदालतया न्यायाधीशपिं दीपककुमार कार्की व डा. आनन्दमोहन भट्टराईया मंकाः इजलासं थ्व फैसला याःगु दु ।
सर्वोच्चं थुकिया पैmसला थगुनेया पुस १ गते हे यायेधुंकूगु खःसां उकिया पूर्ण पाठ धाःसा म्हिगः तिनि जारी याःगु खः । जाति व समुदायया आधारय् बियातःगु आरक्षण यायेमाः धयातःगु सर्वोच्च फैसलाया थ्व पूर्ण पाठ पाय्छि अज्याःगु इलय् वयाः सार्वजनिक जूगु दु गुगु इलय् कि रुपा सुनार प्रकरणया कारणं आः दलित समुदाययात बियातःगु आरक्षणया व्यवस्था खारेज यायेमाः धकाः छुं अनुदारवादीतय्सं सामाजिक सञ्जालय् कडा रुपं सः तयेगु याना हयाच्वंगु दु ।
सर्वोच्चं जारी याःगु थ्व फैसलाय् आः जातीयताया आधारय् बियातःगु आरक्षणया व्यवस्थां धाथें आरक्षण माःपिं मनूतय्त न्याय मयाःगु धासें आवंलि जातीयता व समुदायया आधारय् मखुसं वर्गीयताया आधारय् सुविधापाखें बञ्चित जुयाच्वंपिं मनूतय्त जक आरक्षण बीमाः धयातःगु दु । फैसलाय् गरिब, निमुखा व थःगु स्रोत साधनं शिक्षा आर्जन याये मफुगु वर्गयात आरक्षण दुने हयेत माःगु कानून दयेकेत नं सरकारयात आदेश बियातःगु दु ।
राजनीति, आर्थिक वा सामाजिक रुपं उच्च वर्गय् थ्यंपिं गथे कि मन्त्री, सांसद, संवैधानिक निकायया दुजः, न्यायाधीश, निजामती, जंगी वा प्रहरी सेवाया उच्च पदस्थ कर्मचारी आदिया सन्तानयात आरक्षण काये मदइगु वर्गय् तयेत नं आदेश बियातःगु दु । अथे हे छक्वः आरक्षणया सुविधा कायेधुंकूम्ह मनूयात हानं मेगु आरक्षणया सुविधा मबीत नं आदेशय् तयातःगु दु ।
जनजाति, दलित आक्रोशित
जातीय व समुदायया आधारय् बियातःगु आरक्षणया व्यवस्था खारेज जुइ कथं सर्वोच्च अदालतं बिउगु थ्व फैसलायात संविधानया व्याख्या अःखः जूगु टिप्पणी थन याना हःगु दु । बहुजातीय देय् नेपालय् जातीय आधारय् हे मनूतय्त विभेद यानातःगु कारणं आरक्षणया व्यवस्था नं जातीय आधारय् हे बीमाः धकाः संविधानय् थ्व व्यवस्था यानातःगु खः ।
नेपाःया आदिवासी जनजाति, दलित, मधेसी समुदायया लागं ४० प्रतिशत आरक्षणया व्यवस्था यानातःगु खः । तर देय्या खस आर्य समुदायया मनूतय्सं थ्व आरक्षणया व्यवस्था खारेज यायेमाः धकाः ताः ईनिसें माग याना वयाच्वंगु खः । संयोगवश थ्व व्यवस्था खारेज यायेमाः धकाः फैसला यानादीपिं न्यायाधीशपिं नं निम्हं आर्य सम्प्रदाययापिं लानाच्वंगु दु । थुकिया पीडित समुदायं अस्वीकार यायेगु तयारी जुयाच्वंगु खँ सीदुगु दु ।
LEAVE YOUR COMMENTS