ने. सं. ११४६ अनलाथ्व पुन्हि -

परियत्तिइ ताःलाःपिंत दसिपौ व सिरपाः

येँ – जगतसुन्दर परियत्ति केन्द्रया ग्वसालय् वंगु शुक्रवाः केन्द्रपाखें परियत्ति शिक्षाय् ताःलाःपिं ब्वनामिपिंत दसिपौ व सिरपाः लःल्हात ।
बु.सं. २५६२ दँया परियत्ति शिक्षाय् ताःलाःपिंत सिरपाः व दसिपौ लःल्हाःगु खः । मूपाहांया थासं जापानं झायादीम्ह सातोसि चियानों जापान नं छगू बौद्ध देय् खः धासें थः नं बुद्ध धर्मप्रति श्रद्धा दुम्ह उकिसनं थुकथंया ज्याझ्वलय् ब्वति काये खंगु थःगु निंतिं तसकं लसताया खँ खः धयादिल ।

ज्याझ्वलय् पाहांकथं झायादीम्ह जगतसुन्दर परियत्ति केन्द्रया सल्लाहार डा. त्रिरत्न मानन्धरं बुद्ध शिक्षा थुइके फत धाःसा हे जक छुं कथंया दुःख मदइगु व दुःख व हे वःसां उकियात मदयेकाछ्वयेगु लँ म्हसीके फइ धयादिल । परियत्ति केन्द्रया नायः राजभाई जकःमिया सभापतित्वय् जूगु ज्याझ्वलय् परियत्ति केन्द्रया केन्द्राध्यक्ष माया मानन्धरं लसकुस यानादीगु खः ।