ने. सं. ११४३ तछलागा चौथी -

ब्याज व छेँबहाः मिनाहाया माग यासें आन्दोलन घोषणा

येँ (नेपालभाषा टाइम्स) – नेपाल राष्ट्रिय व्यवसायी महासंघं लकडाउन ईया बैंक ब्याज व छेँबहाः मिनाहा यायेमाःगु माग यासें आन्दोलनया घोषणा याःगु दु । महासंघं म्हिगः येँय् पत्रकार सम्मेलन यानाः आन्दोलनया घोषणा याःगु खः ।

पत्रकार सम्मेलनय् आन्दोलनया न्हापांगु चरण कथं कन्हय् फिब्वः ख्यलय् (माइतीघर मण्डला) ताःफ्वः व ताःचाः सहित प्रदर्शन यायेगु खँ महासंघया अध्यक्ष नरेश कटुवालं जानकारी बियादीगु दु ।

पत्रकार सम्मेलनय् न्ववायेगु झ्वलय् अध्यक्ष कटुवालं धयादीगु दु, ‘कोरोना भाइरसया कारणं मुक्कं उद्योग-व्यवसाय तसकं गम्भीर अवस्थाय् लाःगु दु, थ्व खँया बारे सरकारं मसिउगु मखु, जिमिसं जिमिगु समस्या धायेक धायेकं राज्यं बैंकया ब्याजदर, किस्ता पुलेमाःगु भाका व छेँबहाःया बारे माःगु निर्णय याये फयाच्वंगु मदु, जिमिसं ल्ह्वनागु माग बारे सरकार आः तक नं गम्भीर मजूगुलिं जिपिं आन्दोलनय् वनेत बाध्य जुयागु दु।’

महासंघं लकडाउन ईया ब्याज मिनाहा यायेमाःगु, त्यासाया किस्ता व ब्याज पुलेगु भाका दछि लिफ्याये माःगु, त्यासाया ब्याजदर ८ प्रतिशत यायेमाःगु, लकडाउन ईया छेँबहाः मिनाहा यायेमाःगु माग याःगु खः ।

अध्यक्ष कटुवालं येँ महानगरपालिका, ख्वप नगरपालिकालगायतया मेयरयात नापलानाः छेँबहाः छुट यायेगु निंतिं सहजीकरण यानाबीत इनाप यानागु खँ कनादिसें नेपाल राष्ट्र बैंकयात नं ब्याजदर म्हो यायेत इनाप यानाः ज्ञापनपौ बियागु खँ धयादीगु दु। वय्कलं थौं तक सरकारं संवादपाखें समस्या समाधान याइ कि धइगु थःपिंसं आशा यानागु धासें सरकारं थःपिनिगु मागयात वेवास्ता यात धाःसा कन्हय् फिब्वः ख्यलय् शान्तिपूर्ण प्रर्दशन यायेगु नं जानकारी बियादिल ।

वय्कलं पत्रकार सम्मेलनया झ्वलय् थःपिंसं गुगु माग ल्ह्वनागु खः थ्व जायज जूगु धासें थःपिनिगु मागयात सरकारं सम्बोधन यायेगु कुतः मयात धाःसा चरणवद्ध आन्दोलन यायेगु ख्याच्वः नं बियादिल ।