मांभाय् पत्रकारिता बारे राष्ट्रपतिया ध्यानाकर्षण
येँ (नेपालभाषा टाइम्स)- राष्ट्रपति रामचन्द्र पौडेलं नेपालय् दुगु थीथी मांभाय्या विकास व संरक्षणया निंतिं सरकारयात थम्हं ध्यानाकर्षण याकाबीगु खँ धयादीगु दु । नेवाः पत्रकार राष्ट्रिय दबूपाखें वंगु छगू प्रतिनिधिमण्डललिसे खँल्हासें राष्ट्रपति पौडेलं थ्व खँ धयादीगु खः ।
‘नेपाः थीथी जातजाति दुगु बहुभाषिक, बहुसांस्कृतिकताया क्यब खः । संविधानं हे नेपाःयात बहुभाषिक, बहुधार्मिक, बहुसांस्कृतिक देय् कथं नालातःगु दु । उकिं देय् दुने दुगु थीथी भाय्, संस्कृतिया विकास व संरक्षणया निंतिं संविधानया संरक्षक जूगु नातां जिं माःथाय् ध्यानाकर्षण याकेगु जुइ’ वय्कलं धयादीगु दु ।
थ्व झ्वलय् वय्कलं आदिकवि भानुभक्तया जन्मस्थल तनहुँइ छगू भानु उद्यान दयेकेत्यनागु खँ न्ह्यथँसें अन थीथी भाषाभाषीया साहित्यकारपिनिगु सालिक तयेगु खँ न्ह्यथनादिल । थ्व झ्वलय् वय्कलं उगु थासय् नेवाः भाय्या साहित्यकारतय् सालिक तयेगु निंतिं सालिक उपलब्ध यानाबीत नं इनाप यानादिल ।
राष्ट्रपतियात नापलायेत वंगु पत्रकार दबूया प्रतिनिधि मण्डलं मातृभाषा पत्रकारिताया विकास व संरक्षण, संविधानकथं समावेशी लागू यायेत राष्ट्रपतिपाखें सरकारयात ध्यानाकर्षण याकेत इनाप याःगु खः । दबूया अध्यक्ष नृपेन्द्रलाल श्रेष्ठं राष्ट्रपति पौडेलयात ध्यानाकर्षण पौ लःल्हानादीगु खः ।
ध्यानाकर्षण पौयात संक्षिप्त रुपं न्ह्यब्वयादिसें दबूया वरिष्ठ न्वकु सुनिल महर्जनं राष्ट्रपति संविधानया संरक्षक जूगु ल्याखं संविधानप्रदत्त हकअधिकार कथं सरकारया फुक्क निकाय समावेशी जुइमाःगु खँय् सरकारयात राष्ट्रपतिपाखें ध्यानाकर्षण याकेमाःगु खँ धयादिल । अथेहे वय्कलं खस नेपाली भासं पिदनीगु मूलधारया पत्रिकाया समाचार कक्षय् नं थीथी जातजाति, थीथी मांभाय्यापिं पत्रकारतय्त दुथ्याकाः समाचारकक्ष समावेशी यायेमाःगु, सरकारं दयेकीगु थीथी आयोग प्रतिष्ठान लगायत सरकारी ज्याकूयात समावेशी यायेमाःगु, सरकारं सञ्चार माध्यमतय्त बिया वयाच्वंगु अनुदानय् नं मांभाय्या पत्रपत्रिकातय्त विशेष अनुदान बीमाःगु खँ न्ह्यथनादिल ।
थ्व झ्वलय् वय्कलं मांभासं पत्रकारिता सुरु जूगु थुगुसी सछिदँ थ्यंगु न्ह्यथँसें धर्मादित्य धर्माचार्यं कलकत्तां ‘बुद्धधर्म’ नामं न्हापांगु मांभाय्या पत्रिका पिकाःगु जानकारी राष्ट्रपतियात बियादिसें नेवाः पत्रकार राष्ट्रिय दबुलिं मातृभाषा पत्रकारिताया शताब्दी दँ हनेत्यनागु खँ नं कनादिल । अथेहे दबूपाखें छुं ई न्ह्यः ग्वसाः ग्वःगु अन्तर्राष्ट्रिय मातृभाषा पत्रकारिता सम्मेलनं पारित याःगु घोषणा व क्वःछिउगु थीथी मागया बारे नं जानकारी बियादीगु खः ।
आइतवाः सुथय् हे दबूया प्रतिनिधिमण्डलं सूचना, प्रविधि तथा सञ्चारमन्त्री पृथ्वी सुब्बा गुरुङयात नं नापलानाः थुपिं हे मागत न्ह्यब्वःगु खः ।
LEAVE YOUR COMMENTS