सिद्धहस्त लिलावज्रया झ्वाता अनावरण
येँ(नेपालभाषा टाइम्स)/येँ देय्या प्यम्ह सिद्धहस्त बौद्ध व्यक्तित्वमध्ये छम्ह लिलावज्र वज्राचार्यया झ्वाता पलिस्था याःगु दु । च्यागूगु शताब्दीपाखेया सिद्धहस्त सिद्धाचार्य लिलावज्र वज्राचार्यया पूर्णकदया झ्वाताः थनया कुमारि छेँ लिक्क च्वंगु श्रीखण्डतरुमुल महाविहार (सिख्वंमू बहाः)य् पलिस्था याःगु खः । सिख्वंमू बहाः येँ देय्या हे दकलय् पुलांगु महाविहारमध्ये छगू खः ।
महावहिारय् पलिस्था याःगु लिलाबज्रया झ्वाता वंगु यंलाथ्व पारु (भदौ ८) आइतवाः छगू ज्याझ्वःया दथुइ अनावरण याःगु खः । सिख्वंमू बहाःया स्वम्ह थाय्पाजुपिंसं मंकाःकथं उगु झ्वाता अनावरण यानाबिज्याःगु खः । लछियंकं गुंलाया इलय् बहालय् न्ह्याःगु स्त्रोत ब्वने क्वचाःगु लसताय् जूगु पारु भ्वय्या दथुइ झ्वाताया नं अनावरण याःगु खः । अनावरण याःगु झ्वाताय् बागमति प्रदेशसभा सदस्य लिसें पुलांम्ह मन्त्री शैलेन्द्रमान वज्राचार्य व येँ महानगरपालिकाया उपप्रमुख सुनिता डंगोलं खादा क्वखायेकादीगु खः ।
ज्याझ्वलय् नवासें बागमति प्रदेशया पुलांम्ह मन्त्रीलिसें सांसद वज्राचार्यं बौद्ध आचार्य लिलावज्रया योगदानया खँ कनादिसें लिलावज्रं बुद्ध धर्मया ख्यलय् बियादीगु योगदानयात अन्तर्राष्ट्रिय रुपं हे चर्चा परिचर्चा यायोमाःगु खँ कनादिल ।
येँ महानगर उपप्रमुख डंगोलं झीगु थःगु मौलिक संस्कार, संस्कृति व मौलिकता ल्यंकातयेत पुस्तान्तरण याना वनेमाःगु खँ बः बियादिल ।
सिद्धहस्त लिलावज्र वज्राचार्य सिख्वंमू बहाःयाम्ह हे खःसा वसपोलयात ‘लिलपा’या नामं नं म्हसीकेगु याः । वसपोल लिलावज्रं हे मरुसतः दयेकूगु धइगु आख्यान दु । मरुसतः दयेकाः ल्यं दुगु सिं सिंल्यंसतः दयेकूगु व वयां लिपा नं ल्यनाच्वंगु सिँया कुचाकाचापाखें सिंख्वंमू बहाः दयेकूगु धइगु खँ दु । सिद्धहस्त पुरुष लिलावज्रया उगु झ्वाता कलाकार (मूर्तिकार) महेश तुलाधरं निर्माण यानादीगु खः ।
ज्याझ्वलय् उपप्रमुख डंगोलं थुगुसीया एसइइ परीक्षाय् उत्तीर्ण महविहारया कुलपुत्र/कुलपुत्रीपिंत नं हनापौ देछासे हनेज्या यानादीगु खः ।
श्रीखण्ड तरुमुल महाविहार (सिख्वंमूबहाः) संरक्षण तथा सञ्चालन समितिया नायः ई. दिल्लीरत्न शाक्यया सभापतित्वय् जूगु ज्याझ्वलय् येँ महानगरपालिका २३ वडा नायः मचाराजा महजृनया नं उपस्थिति दुगु खः ।
LEAVE YOUR COMMENTS