येँ महानगरया नीति तथा कार्यक्रम संशोधनसहित पारित याइगु
येँ (नेपालभाषा टाइम्स)- येँ महानगरपालिकया नगरसभा थौं ३ बजे च्वनीगु जूगु दु । वंगु असार १० गतेनिसें स्थगित जुयाच्वंगु नगरसभा थौं च्वनेगु नितिं येँ महानगरपालिकाया मेयर बालेन साहया सचिवालयं सुचं छ्वयेधुंकूगु दु । नीति तथा कार्यक्रम पारित जुइगु मखनेवं असार १० गते थःम्हं हे सःतूगु नगरसभाय् मवःम्ह मेयर साहं बजेट पारित यायेमाःगु दबाबया कारणं थौं नगरसभा सःतूगु खः ।
थौं नगरसभा च्वनेगु नितिं म्हिगः वडाध्यक्षपिं नेपाली कांग्रेसया नवीन मानन्धर व ख्यामराज तिवारी, एमालेया नवराज पराजुली व एकीकृत समाजवादी ईश्वरमान डंगोललिसे लिसे मेयर साह व उपमेयर सुनिता डंगोल सहलह ब्याकूगु खः । म्हिगःया सहलहया झ्वलय् नीति तथा कार्यक्रमय् वडाध्यक्षतय्सं हःगु संशोधन प्रस्तावयात दुथ्याकाः वनेगु अनौपचारिक सहमति जूगु खँ धाःगु दु । थ्व सहमति लिपा जक मेयर साहं नगरसभाया बैठक सःतूगु खँ नं धाःगु दु । म्हिगः वार्ता लिपा थौं ३ बजे नगरसभाया बैठक च्वनेगु निंतिं नगरसभा सदस्यतय्त म्यासेज यानाः जानकारी याकूगु खः ।
आर्थिक दँ २०८१÷८२या निंतिं मेयर साहं ६४ बुँदाया नीति तथा कार्यक्रम पेश याःगु खः । तर उगु नीति तथा कार्यक्रमयात कयाः एमाले, कांग्रेस व समाजवादीपाखें त्याना वःपिं अध्यक्षतय्सं मंकाः कथं २७ बुँदाया संशोधन प्रस्ताव दर्ता याःगु खः । मेयर साहं थःगु नीति तथा कार्यक्रमय् प्रस्ताव यानातःगु न्हूसतकयात ‘नो भेहिकल जोन’ दयेकेगु योजनाया विरोध यासें कांग्रेसया मानन्धर, एमालेया पराजुली व समाजवादीया डंगोलं मंकाः संशोधन प्रस्ताव हःगु खः ।
अथे खःसां मेयर साहं जबर्जस्ती नीति तथा कार्यक्रम पारित यायेत स्वःगु खः, तर वडा अध्यक्षतय्सं नीति तथा कार्यक्रमय् थःपिनि संशोधन दुथ्याकेमाःगु अडान कायेवं मेयर साहं बजेट जक पेश याकेबियाः नगरसभा स्थगित याःगु खः । थ्व लिपा असार १० गते नगरसभाया सःतूगु खः । तर थ्व नगरसभां नं नीति तथा कार्यक्रम पारित जुइगु सम्भावना मखनेवं मेयर साह नगरसभाय् तकं मवःगु खः । थःम्हं सःतूगु बैठकय् थः हे मवंम्ह मेयर साहं उबलय् स्वंगू राजनीतिक दलया कारणं बैठक च्वनेमफुगु धासें सामाजिक सञ्जालय् च्वःगु खः, गुकियात कयाः मेयर साहया तसकं आलोचना जूगु खः ।
LEAVE YOUR COMMENTS