थौं मोनोरेलया डीपीआर सम्झौता

येँ – अन्ततः येँ महानगरपालिकां मोनोरेल चले यानां त्वःतीगु जूगु दु । येँया रिंगरोडय् मोनोरेल सञ्चालनया लागिं थौं डीपीआर तयार यायेत हस्ताक्षर याइगु जूगु दु । थौं सुथय् ११ बजे राष्ट्रिय सभागृहस्थित येँ महानगरपालिकाया ज्याकुथी चिनियाँ कम्पनीलिसे डीपीआर दयेकेगु सम्झौताय् हस्ताक्षर यायेगु ज्याझ्वः दयेकातःगु दु ।

वंगु स्वला न्ह्यः तिनि चीनया चाइना रेलवे कम्पनीं येँय् मोनोरेल सञ्चालन सम्बन्धी सम्भाव्यता अध्ययनया रिपोर्ट बिउगु खः । उगु रिपोर्टयात येँ व यल महानगरपालिकां अध्ययन यानाःलि आः डीपीआर दयेकेगु सम्झौता यायेत्यंगु खः । चिनियाँ कम्पनीं थःपिंत डीपीआर दयेकेगु जिम्मा बिउगुयां खुलानिसें गुला तकया दुने डीपीआर तयार याये फइगु खँ धाःगु दु ।

डीपीआर तयार जुल धाःसा वयां लिपा प्यदँनिसें न्यादँया दुन मोनोरेल निर्माण हे सिधयेके फइगु खँ धाःगु दु । आःयात थ्व मोनोरेल येँया रिंगरोड चाःहिली कथं दयेकेत्यंगु खः । रिंगरोडया २७ किलोमिटर लागाय् थ्व मोनोरेल दयेकेगु प्रस्ताव चिनियाँ कम्पनीं तःगु खः ।

रिंगरोड येँय् लाःसां उकिया छकू ब्व यलय् नं लानाच्वंगु दु । मोनोरेलया लागिं निगुलिं महानगरपालिकां स्वीकृति बिउसां उकिया लागिं प्रदेश व संघीय सरकारया नं स्वीकृति माः । थुकिया लागत १ अर्ब १६ अर्ब तका तुइगु अनुमान यानातःगु दु ।