येँ महानगर दुने सूर्तीजन्य पदार्थ छ्यलाबुलाय् रोक लगे याइगु

येँ –  येँ महानगरपालिकां सुर्तीजन्य पदार्थया छ्यलाबुला म्हो याकेगु निंतिं आः चरणवद्ध रुपं ज्याझ्वः न्ह्याकीगु जूगु दु । येँ मनपां सार्वजनिकस्थलय् सुर्तीजन्य पदार्थया छ्यलाबुलाय् म्हो हयेगु ल्याखं उकथं चरणवद्ध रुपं ज्याझ्वः न्ह्याकेत्यंगु खः । उकिया निंतिं येँ मनपां ‘स्वच्छ सहर’ ज्याझ्वः संचालन यायेत्यंगु खःसा थुकथंया ज्याझ्वः संचालन याइगु विश्वया ५० गू सहरमध्ये येँ महानगर नं छगू खः ।

लिपांगु इलय् सुर्ती व सुर्तीजन्य पदार्थया छ्यलाबुला अप्वया वनाच्वंगु सन्दर्भय् येँ मनपां उकथंया ज्याझ्वः न्ह्याकेत्यंगु खः ।ज्याझ्वःकथं येँ महानगर लागाय् सुर्ती व सुर्तीजन्य वस्तुया विक्री वितरण व उकिया छ्यलाबुलायत छक्वलं रोक लगे यायेगु मखसे क्रमश रोक लगे याना वनेगु येँ मनपां न्ह्यथंगु दु ।

येँ मनपाया प्रमुख हरिप्रभा खड्गी श्रेष्ठं सहरय् धुम्रपान व सुर्तीजन्य वस्तुया छ्यलाबुला अप्वया वनाच्वंगुयात म्हो यानाः स्वस्थ व स्वच्छ सहर निर्माण यायेगु उद्देश्यं थुकथंया ज्याझ्वः न्ह्याकेत्यनागु जानकारी बियादिल । येँ मनपां सार्वजनिकस्थलय् धुम्रपान, सुर्ती व सुर्तीजन्य पदार्थया छ्यलाबुलाय नियमनया निंतिं दत्याया कार्ययोजना नं संचालन याना वयाच्वंगु दु ।

छम्हं मेम्हेसित मपुनीगु ल्वय्या जोखिमं मानव स्वास्थ्ययात मुक्त यायेगु उद्देश्यं येँ मनपां उकथंया योजना न्ह्याका वयाच्वंगु खः ।
विश्व स्वास्थ्य संगठनया तथ्यांककथं धुम्रपान, अय्लाःया सेवन, अस्वस्थकर नसा, निष्क्रिय जीवन लगायत छम्हं मेम्हेसित मपुनीगु ल्वय्या प्रमुख कारण खः ।

 

सम्बन्धित बुखँ

LEAVE YOUR COMMENTS