न्हापांखुसी एकल हुलाप्याखं ब्वज्या

येँ – हुलाप्याखं विधाय् न्हापांखुसी एकल हुलाप्याखं न्ह्यब्वयेगु ज्या जूगु दु । वंगु आइतवाः थनया राष्ट्रिय नाचघर जमलय् ‘स्वजन रघुवंशी एकल साँझ’या नामं उगु ज्याझ्वः जूगु खः । कलाकार रघुवंशीं प्रत्यक्ष वाद्यवादन व म्येँलिसें थीथी न्हय्गू विधाया हुलाप्याखं न्ह्यब्वयादीगु खः ।लोक, आधुनिक हुलाप्याखंलिसें कत्थक, भरतनाट्यम, ऐतिहासिक, सांस्कृतिक कात्ति प्याखं न्ह्यब्वयेगु झ्वलय् नमस्कार प्याखनं कलाकार रघुवंशीं थःगु याकः हुलाप्याखं ज्याझ्वः शुरु यानादीगु खः ।

प्याखं न्ह्यब्वयेगु झ्वलय् कलाकार रघुवंशीं कात्ति प्याखं द्यः ल्हायेगुपाखें गुरु, मांअबु, इष्टदेव, नाट्यश्वर, वाद्यवादक, जल, वायु, पृथ्वी, अग्नि, आकाश, स्वकुमि, कर्मभूमि सकल्रप्रति वन्दना यानादीगु खः । वया लिपा दँय्दसं कात्तिक महिनाय् यलया मंगलबजारय् च्वंगु कात्ति दबुलिइ जक न्ह्यब्वयेगु याना वयाच्वंगु कात्ति प्याखंयात न्हापांखुसी दबुलिइ न्ह्यब्वयादीगु खः । झण्डै ४०० दँ पुलांगु कात्ति प्याखं अन्तर्गया उषाहरण लीलाया कुमार नृत्य न्ह्यब्वयादीगु इलय् स्वकुमिपिं सकलें अतिकं उत्साहित जुयादीगु खः ।

‘विश्वया दकलय् प्राचीन वियोगान्त हुलाप्याखंया रुपय् गिनिज बुकय् ग्रीकया ट्र्याजिक डान्स फर्मयात कयातःगु दु । तर थ्व प्याखं लोप जुइधुंकूगु दु । कात्तिप्याखं नं ट्र्याजिक र्फमय् हे लाः, थ्व प्याखं थौंया इलय् तक निरन्तर न्ह्यानाच्वंगु दु । थ्व झीगु गौरव खः’ शताब्दी पुरुष वरिष्ठ संस्कतिविद् सत्यमोहन जोशीं नुगःखँ प्वंकेगु झ्वलय् कात्ति प्याखंया ऐतिहासिक पक्षयात कयाः कुलेगु झ्वलय् धयादीगु खः ।

ज्याझ्वलय् चचाप्याखं अन्तर्गतया पंचकपाल प्याखं नं न्हापांखुसी दबुलिइ न्ह्यब्वयेगु ज्या जूगु खः । गोप्य रुपं न्ह्यब्वइगु चचाप्याखं अन्तर्गतया थ्व प्याखं बौद्ध परम्परा दुने महायान सम्पदाया प्याखंया रुपय् कायेगु याः । मादलया तालय् न्ह्यब्वयादीगु झ्याउरे प्याखंयात स्वकुमिपिंसं अतिकं ययेकूगु खःसा ‘वान्स मोर’या सः तकं थ्वःगु खः ।

भारतया इलाहावाद विश्वविद्यालयं कत्थक नृत्यय् गोल्ड मेदलतकं प्राप्त यानादीम्ह रघुवंशीं भरतनाट्यमलिसें पाश्चात्य शैलीया साल्सा प्याखं न्ह्यब्वयादीगु इलय् नं स्वकुमिपिं मन्त्रमुग्ध जूगु खः । साल्सा प्याखं् धाःसा वय्कलं कलाकार कृपा वज्राचार्यलिसें न्ह्यब्वयादीगु खः । कृष्णं कालिया नागया दमन याःगु बाखं दुथ्याःगु कत्थक प्याखं १८ मिनेट तक न्ह्यब्वयादीगु खःसा दकलय् लिपांगु प्रस्तुति कथं विश्वन्यंकंया मांपिंत श्रद्धा व आदर व्यक्त यासें ‘आमा’ नांया हुलाप्याखं न्ह्यब्वयादीगु खः ।

ज्याझ्वलय् नुगःखँ प्वंकेगु झ्वलय् वरिष्ठ नृत्य निर्देशक हनी श्रेष्ठं छम्ह मनुखं म्येँ हालाः वा बाजं थानाः एकल ज्याझ्वः न्ह्यब्वयेगु स्वयां हुलाप्याखनय् थुकथं एकल ज्याझ्वः यायेगु तकसं थाकुगु विषय खः धयादिल । कलाकार रघुवंशीया खुल्लारुपं प्रशंसा यासें वय्कलं धयादिल, ‘थ्व म्येँ हालेगु व वाद्यवादन थायेगु थेंज्याःगु अःपुगु एकल ज्याझ्वः मखु ।

छम्ह हे मनुखं श्रृंगार, भेषभूषाय् तकं विविधता क्यनाः थीथी मुद्रा व विधाय् हुलाप्याखं न्ह्यब्वयेगु साधारण विषय मखु । हुलाप्याखनय् एकल ज्याझ्वः यायेगु आँट सुनां याये फइगु विषय नं मखु । तर स्वजन रघुवंशी थुकी सफल जुयादीगु दु ।’वाङ्मय शताब्दी पुरुष जोशी व हुलाप्याखं विधाय् नेपाःया हे न्हापांम्ह प्राध्यापक वरिष्ठ नृत्य निर्देशक श्रेष्ठं नाट्यश्वरया पुजालिसें त्वाःदेवाय् मत च्याकाः उलेज्या यानादीगु ज्याझ्वः नृत्य निर्देशक संघ यल कचा व सांस्कृतिक संस्थानया मंकाः ग्वसालय् जूगु खः ।

सम्बन्धित बुखँ

LEAVE YOUR COMMENTS