प्यम्ह च्वमिया बाखं सफूया पितब्वज्या
यल(नेपालभाषा टाइम्स)÷मिसा साहित्यकार मुनाया ग्वसालय् वंगु शनिवाः थनया कोपुण्डालय् च्वंगु सातोआकी भवनय् जूगु छगू ज्याझ्वःया दथुइ प्यम्ह च्वमिया बाखं सफूया पितब्वज्या याःगु दु ।
ज्याझ्वलय् माणिक उराय्या ‘जि म्वानाच्नागु दनि’, समान्त श्रेष्ठया ‘मयजुकलः डटकम’, दिब्या वज्राचार्यया ‘चिग्वः मल्ता’ व रामेश्वर जलनया ‘बाखं कि प्याख’ सफूया पितब्वज्या याःगु दु । प्यंगुलिं सफू नागार्जुन पब्लिकेशनं पिथंगु खः ।
नेपालभाषा परिषद्या प्राज्ञ नांजाःम्ह साहित्कार ध्रुव मधिकःमि मूपाहांकथं झायादीगु ज्याझ्वलय् नेपाल प्रज्ञा प्रतिष्ठानया प्राज्ञ अगिब बनेपाली, बाखं च्वमि सुधिर ख्वबि, मिसा साहित्यकार मुनाया नायः विमलप्रभा वज्राचार्यं मंकाःकथं सफूया पितब्वज्या यानादीगु खः ।
पितब्वज्या मूपाहाँ मधिकःमिं साहित्य च्वयेगु ज्याय् स्रष्टातय् खने दयाच्वंगु अग्रसरता उत्साहप्रद खने दु धासें साहित्यिक संघसंस्थातय्सं ब्वँमियाथाय् तक स्रष्टातय् थ्यंकेत कुतः यायेमाः धयादिल । कवयित्री प्रतिसरा साय्मिं स्रष्टातय्त भिंतुना देछानादीगु ज्याझ्वलय् प्रतिष्ठानया प्राज्ञ अगिब बनेपालि, बाखं च्वमि सुधिर ख्वबि लगायतं नुगःखँ तयादीगु खः । ज्याझ्वः संस्थाया अध्यक्ष वज्राचार्यया सभापतित्वय् जूगु खः ।
LEAVE YOUR COMMENTS