राष्ट्रपतियात न्हूदँ ११४५ या भिंतुना

येँ (नेपालभाषा टाइम्स)- नेपाल संवत न्हूदँ राष्ट्रिय समारोह समिति ११४५ या नायः राजेन्द्र प्रसाद श्रेष्ठं म्हिगः राष्ट्रपति रामचन्द्र पौडेलयात नापलानाः न्हूदँया भिंतुना देछानादिल । म्हिगः सुथय् राष्ट्रपति निवास शीतल निवास झायाः वय्कलं राष्ट्रपति पौडेलयात भिंतुना देछानादीगु खः ।
उगु इलय् नायः श्रेष्ठं राष्ट्रपति पौडेलयात न्हूदँया लसताय् “नेपाः डे” हनेत व राज्यस्तरं हे न्हूदँया ज्याझ्वः यायेत इनाप यानादीगु दु ।

राष्ट्रपति पौडेलं न्हूदँया लसताय् राष्ट्रिय विभूति शंखधर साख्वाःयात लुमंकाः राष्ट्रपति ज्याकुथिइ ज्याझ्वःया ग्वसाः ग्वयातःगु खँ कनादिसें न्हूदँयात कयाः राज्यपाखें यायेमाःगु ज्याखँ बारे सहलह ब्याकेगु खँ कनादीगु खः ।

राष्ट्रपति नापलायेत नायः श्रेष्ठया नेतृत्वय् वंगु उगु पुचलय् न्हूदँ संरक्षण समाजया नायः प्रा.डा. नरेशमान बज्राचार्य, समारोह समितिया सल्लाहकार पूर्व मन्त्री भिमसेनदास प्रधान, न्हूदँ समारोह समिति सचिवालय दुजः सुजीव बज्राचार्य सहभागी जुयादीगु खः ।