ने. सं. ११४६ बछलाथ्व दुतिया -

भाषासेवी शाक्यया न्यापु म्येँया म्युजिक भिडियो पिदन

येँ(नेपालभाषा टाइम्स)- भाषासेवी निरञ्जनरत्न शाक्यं च्वयादीगु न्यापु म्येँया म्युजिक भिडियो पिदंगु दु । वंगु शनिवाः थनया सीटीसी मलय् जूगु छगू ज्याझ्वःया दथुइ शाक्यया न्यापु म्येँया म्युजिक भिडियो पिथंगु खः ।

नेवाः देय् दबूया केन्द्रीय दांभरिंतकं जुयाच्वनादीम्ह समाजसेवीलिसें साहित्यकार शाक्यया सभापतित्वयु जूगु ज्याझ्वःया उलेज्या मूपाहांकथं झायादीम्ह नेवाः न्ह्यलुवा नापं नेपालभाषा एकेदेमिया भाइस चान्सलर मल्ल के. सुन्दरं त्वाःदेवाय् मत च्याकाः यानादीगु खः ।

न्यापुं म्युजिक भिडियोया निर्देशन यानादीम्ह निर्देशक रामकृष्ण खड्गीं लसकुस यानादीगु ज्याझ्वलय् ‘यःम्ह छ, ययेकूम्ह छ’, ‘बइबिल छ’, ‘जिन्दगी होसय् मदुगु’, अय्लाः अय्लाः’, ‘हुलय् नं याकचा’ म्येँया म्युजिक भिडियो पितब्वज्या याःगु खः ।

ज्याझ्वलय् नांजाःम्ह म्येँ हालामि जुजुकाजी रंजित, वरिष्ठ सिने पत्रकार विजयरत्न असंबरे, न्यापुं म्येँया म्युजिक भिडियो निर्देशन यानादीम्ह नांजाःम्ह निर्देशक रामकृष्ण खड्गीं म्युजिक भिडियो निर्माणया
थीथी पक्षयात कयाः नुगःखँ तयादीगु खः ।

न्यापुं म्येँ नांजाःम्ह म्येँ हालामि रिता महर्जनं लुसय् हनादीगु खःसा योगेश वैद्य, भूपेन्द्र वज्राचार्य, संगीता शाक्य थापा, मिङ्मा शेर्पां सः बियादीगु दु । म्युजिक भिडियोया छाँयाकन रक्की महर्जन व लूजः सिंहं यानादीगु खःसा सम्पदान बालकृष्ण वंशीं यानादीगु खः ।

ज्याझ्वलय् म्युजिक भिडियोया कलाकारलिसें प्राविधिकधिपंत मतिनाया चिं मूपाहां व पाहांपिंसं लःल्हानादीगु खःसा मूपाहांलिसें पाहांपिंत सभानायःलिसें म्येँ च्वमि शाक्यं मतिनाया चिं लःल्हानादीगु खः ।
पितब्वज्या जूगु म्युजिक भिडियो ‘यःम्ह छ, ययेकूम्ह छ’य् अनुज शाक्य, श्रृष्टि महर्जन, विराज राजोपाध्याय, विक्रम खड्गी, निरज प्रधान, रेणुका खड्गी सोहेल नेम्कुल ‘वइबिल छ’ म्येँया म्युजिक भिडियोय् सुहित मानन्धर, सुष्मा वज्राचार्य, राजेश श्रेष्ठ, हरिश खड्गी ‘जिन्दगी होस मदुगु म्येँया म्युजिक भिडियोय् शोभा महर्जन वत्स शाक्य, अन्नपूर्णेश्वरी श्रेष्ठ, ‘अय्लाः अय्लाः’ म्युजिक भिडियोय् अमोघवीर वज्राचार्य, रोजिना सुवाल मोहिद्दिन खान, चन्दा श्रेष्ठ व ‘हुलय् नं याकःचा’ म्युजिक भिडियोय् हसना महर्जन, जितेन्द्र शाक्य, निभाः डंगोल युगेन शाक्यं अभिनय यानादीगु दु ।
ज्याझ्वलय् निर्देशकखड्गी, संगीतकार महर्जनयात विशेष सम्मान नं याःगु खः ।