राससं नेपालभाषा समाचार सेवा न्ह्याकीगु
येँ (नेपालभाषा टाइम्स)- राष्ट्रिय समाचार समिति (राससं) याकनं हे नेपालभाषा व मैथिली भासं समाचार सेवा बीगु जूगु दु । नेपालभाषा समाचार सेवा न्ह्याकेगु निंतिं म्हिगः राससया ज्याकुथिइ नेपालभाषाया न्ह्यलुवाः पत्रकारतलिसे सहलह ब्याकूगु खः ।
सहलहय् न्ववानादिसें राससया कार्यकारी अध्यक्ष धर्मेन्द्र झां राज्यया समावेशिताया नीतियात नालाकासें राससं नं थीथी भासं समाचार सेवा बीगु ज्या न्ह्याकागु खँ धयादीगु खः । थ्वयां न्ह्यः अवधी भासं समाचार सेवा न्ह्याकेधुनागु खँ न्ह्यथँसें वय्कलं आःया लछि निलाया दुने हे नेपालभाषां नं समाचार सेवा न्ह्याकेगु तयारी जुयाच्वंगु खँ धयादिल ।
अथेहे राससया नायब महाप्रबन्धक राजु शाक्यं राससं २०७४ सालं हे समावेशीता कथं थीथी भासं समाचार सेवा बीगु तयारी यानागु खःसां अबलय् बजेटया अभावं न्ह्याके मफुगु खँ न्ह्यथँसें थुगुसी सञ्चार मन्त्रालयपाखें हे बजेटया व्यवस्था जूगु जानकारी बियादिल । अथेहे मेम्ह नायब महाप्रबन्धक सोमनाथ लामिछानें नेपाली व अंग्रेजी भाषाया सेवा बाहेक मेमेगु मातृभाषाया सेवायात निःशुल्क यायेगु बारे सहलह जुयाच्वंगु खँ धयादिल ।
राससया प्रधानसम्पादक उत्तम सिलवालं नेपालभाषा सेवाया निरन्तर न्ह्याकातयेत सरोकारवालातय्सं ग्वाहालि आवश्यक जुइगु खँ धयादिल । राससं पिथनीगु नेपालभाषा सेवाया भाय् येँया नेवाः भाय्यात मानक भाषा कथं कयाः न्ह्याकेगु बारे सहलह जूगु खः ।
सहलहय् भाषा आयोगया दुजः सुरेश मानन्धर, सन्ध्या टाइम्स पिथना प्रा.लिया अध्यक्ष व गोरखापत्रं पिदनीगु नेपालभाषा पृष्ठया संयोजक रमेशकाजी स्थापित, ईलोकं प्रकाशनया प्रबन्धक नरेशवीर शाक्य, नेवाः अनलाइनखबरया प्रबन्धक सम्पादक सुजीव वज्राचार्य, ई छापा डटकमया सम्पादक ज्ञानराम श्रेष्ठ, नेपालभाषा टाइम्सया सम्पादक तेजनारायण महर्जन, स्तम्भकार अस्मित मल्ल, नेपाः टिभीया कार्यकारी निर्देशक रामकृष्ण खड्गी, नेवाः पत्रकार राष्ट्रिय दबूया केन्द्रीय महासचिव केके मानन्धर, कोषाध्यक्ष बाबुकाजी साछेँ, माउन्टेन टेलिभिजनया नेपालभाषा डेस्क प्रमुख विशन्तर शाक्यपिनि उपस्थिति दुगु खः । वय्कःपिंसं राससया समाचार अनुवाद वइगु जक मखु, नेवाःतय् विषयय् नं समाचार पिथनेमाःगु खँय् बःबिउगु खः ।
LEAVE YOUR COMMENTS