ने. सं. ११४४ कौलाथ्व चौथी -

उत्सव हे यानाः मरुसतःया मू थां धस्वाकीगु

येँ -ऐतिहासिक मरुसतः पुनर्निर्माणया झ्वलय् कंस आइतवाः निर्माण ज्याया दकलय् महत्वपूर्ण ज्याझ्वः जुइत्यंगु दु । वकुन्हु मरुसतःया दकलय् महत्वपूर्ण ब्व जुयाच्वंगु मू थां व निनाः तयेत्यंगु खँ पुनर्निर्माण समितिं धाःगु दु । आइतवाः श्रीपञ्चमि कुन्हु सुथय् छगू तःधंगु पुजाया दथुइ थ्व मू थां व निनाः तयेत्यंगु खः ।

पुनर्निर्माण समितिया नायः राजेश शाक्यं कनादी कथं थ्व मू थां धस्वाकेधुंकल कि मरुसतःया तल्ला थपे यायेगु ज्या न्ह्याइ । उकिं मरुसतः पुनर्निर्माणया थ्व दकलय् महत्वपूर्ण ज्या खः । मरुतलय् तइगु थ्व मू थां व निनाः दयेकाः थौंकन्हय् हनुमानध्वाखा कालभैरव द्यःया न्ह्यःने तयातःगु दु । आइतवाः कालभैरव द्यःयाथासंनिसें बाजंगाजं सहित जात्रा यानाः मनूतय्सं क्वबियाः मरुसतः तक यंकीगु ग्वसाः दुगु खँ पुनर्निर्माण समितिया सचिव गौतम डंगोलं कनादिल ।

मरुसतः पुनर्निर्माणया ज्याय् येँ देय्या फुक्क हे जनसमुदायया सहभागिता दयेमा व अपनत्व ग्रहण जुइमा धकाः उकिया हे प्रतिनिधित्व यासें येँय् दुपिं फुक्क हे नेवाः जातीय समुदायया नायःपिं, ६३ गू त्वाःया ज्यापु थकालिपिं, १८ बहाः, १६ बही व १० गू विहारया वज्राचार्य लिसें शाक्य चक्रेश्वरपिसं नं ब्वति काइ । वय्कःपिं सकलें लगायत येँ मनपाया मेयर विद्यासुन्दर शाक्यं मरुसतःया मू थां व निनाःया विधिवत् पूजा याइगु ज्याझ्वः दु ।

मू थांया रुपय् अन प्यंगः थां तयेमाः । थ्व प्यंगः थांयात मरुसतः समावेश जुयाच्वंगु प्यंगू वडा (१९, २०, २३ व २४) या प्रतिनिधित्व यासें अन थनेगु ज्या जुइगु खँ नायः शाक्यं कनादिल ।

कालभैरव द्यःयाथासं निसें द्यःखः क्वबी थें थ्व मू थां व निनाः क्वबियाः मरुसतः तक यंकी । उगु इलय् दकलय् न्ह्यःने नाय्खिं बाजं दइसा उकिया नापनापं धाः, धिमे व बाँसुरी बाजं नं सहभागी जुइ । वकुन्हु मू थां व निनाः तयेगु ज्यायात छगू उत्सवया रूपय् हे सम्पन्न यायेगु ग्वसाः जुयाच्वंगुलिं उकी सकल नगरवासीं ब्वति कायेत नं पुनर्निर्माण समितिं इनाप याःगु दु ।