सशस्त्र प्रहरी अस्पतालयात पीपीई बुथ लःल्हात

येँ – कोरोना रोग विशेष अस्पतालया कथं ज्या यानाच्वंगु सशस्त्र प्रहरी बलया बलम्बुइ च्वंगु अस्पतालयात नेपाटप अर्गनाइजेशनं दयेकूगु पीपीई बुथ लःल्हाःगु दु ।

शुक्रवाः येँ महानगरपालिकाया उपमयेर हरिप्रभा खड्गीं अस्पतालया प्रमुख डीआईजी हरिचन्द्र अधिकारीयात बुथ लःल्हाःगु खः । नेपाटपं दयेकूगु दकलय् न्हापांगु पीपीई बुथ सशस्त्रयात लःल्हाःगु खःसा स्वनिगलं पिने हेटौंडा अस्पतालयात नं अज्याःगु बुथ लःल्हाःगु दु । विश्वन्यंक महामारी कथं न्यनाच्वंगु कोरोना नेपालय् नं निगूगु चरणय् थ्यंगु खँयात वाःचायेकाः नेपाटपं पीपीई बुथ दयेकूगु खः ।

सशस्त्र प्रहरीया अस्पतालयात पीपीई बुथ लःल्हासें उपमेयर खड्गीं कोरोनाया संक्रमणया परिक्षण यायेगु निंतिं थुगु बुथ ग्वाहालि जुइगु धयादिसें सरकारं लागू याःगु लकडाउनया पालना यायेत फुक्कसित इनाप यानादिल ।

अथेहे सशस्त्रया डिआईजी अधिकारीं सशस्त्रया अस्पतालयात कोरोना विशेष अस्पतायल दयेकेगु निंतिं १२० जनरल बेड व २० आईसीयु बेड निर्माणया ज्या लिप्पांगु चरणय् थ्यंगु धयादिल ।

नेपाटप अर्गनाइजेसनया सिनियर प्रोडक्सन म्यानेजर नविन्द्रमान सिं नेपालय् कोरोनाया संक्रमण भयावह स्थितिइ थ्यंगु अवस्थाय् सुरक्षित तवरं बिरामीया नमूना संकलन यायेत थुगु बुथया निर्माण यानाःगु जानकारी बियादिल । वय्कलं नेपाःया हे न्हापांगु कोरोना डेडिकेटेड अस्पताल संचालन याःगुलिं सशस्त्र अस्पतालयात न्हापांगु बुथ लःल्हानागु धयादिल ।

अर्गनाइजेसनया सिद्धिविनायक इण्डष्ट्रिज प्रा.लि.या डाइरेक्टर रुपक श्रेष्ठं येँ व हेटौंडाया नापं कोहलपुरया भेरी क्षेत्रीय अस्पतालयात फ्रेब्रिकेसन युनिट्स लःल्हानागु व मेमेगू अस्पतालयात नं ग्वाहालि यायेगु योजना दुगु कनादिल ।