गणपतिलाल श्रेष्ठयात संस्कृति मन्त्री दयेकेत पहल

येँ- प्रधानमन्त्री सुशिला कार्कीया सरकारय् आः तक स्वनिगःया प्रतिनिधित्व यासें आः तक सुं हे नेवाः मन्त्री नियुक्ति मयाःगु खँय् नेवाः समुदायं चिउताः प्वंकाहःगु दु । थ्व झ्वलय् वर्तमान सरकारय् च्वनेत उपयुक्त ल्याय्म्ह नेवाः पात्रया रुपय् सम्पदा अभियन्ता गणपतिलाल श्रेष्ठया नां चर्चाय् वःगु दु ।

ताः ई न्ह्यवंनिसें सम्पदा संरक्षणया अभियानय् सक्रिय जुया च्वनादीम्ह श्रेष्ठयात संस्कृति मन्त्रालयया जिम्मा बीमाःगु सः स्वयम् सम्पदा अभियन्तातय्सं हे थ्वयेकाहःगु दु । सूत्रतय्सं धाःकथं थुगु मन्त्रालयया लागिं मेपिं नं मनूतय् नां वयाच्वंगु खःसां संस्कृति सम्पदा संरक्षणय् अनुभवी व्यक्तिया रुपय् गणपतिलाल श्रेष्ठया सम्भावना नं अप्वया वनाच्वंगु दु ।

थ्वहे झ्वलय् नेवाः देय् दबूया नायः पवित्र वज्राचार्यं स्वनिगःया नेवाःतय् प्रतिनिधित्व समेत जुइ कथं सम्पदा अभियन्ता श्रेष्ठयात संस्कृति मन्त्रालययात जिम्मा बीगु पाय्छि जुइगु खँ कनादीगु दु । थौं छगू भिडियो सन्देश जारी यासें वय्कलं थ्व इनाप यानादीगु खः ।

उकथं हे मेम्ह सम्पदा अभियन्ता यादवलाल कायस्थं नं संस्कृति मन्त्रीया रुपय् गणपतिलाल श्रेष्ठयात नियुक्ति यायेगु पाय्छि जुइगु बिचाः तयादीगु दु । सामाजिक सञ्जालय् थःगु धापू पोष्ट यासें वय्कलं थ्व खँ धयादीगु खः ।

‘अनलाइन खबर’ पाखें नकतिनि सार्वजनिक याःगु ‘पीदँ क्वय्यापिं पीम्ह सशक्त व्यक्तित्व’ पिनि धलखय् नं समावेश जूम्ह श्रेष्ठ वंगु जेन जी आन्दालनयात नं सक्रिय रुपं ग्वाहालि यानादीम्ह खः । सम्पदा संरक्षण सम्बन्धी ऐन कानुन लिसें प्रशासनिक ज्याखँ बारे नं जानकार श्रेष्ठयात मन्त्रिमण्डलय् यंकेत स्वनिगःया मेपिं सम्पदा अभियन्तातय्सं नं माग याना हयाच्वंगु दु ।