ने. सं. ११४४ ञलाथ्व नवमी -

बुंगद्यःया जात्रा क्वचाःगु सुचं

यल(नेपालभाषा टाइम्स)- बर्षा व सहकालया द्यः बुंगद्यःया जात्रा क्वचाःगु औपचारिक रुपं जानकारी बीगु ज्या जूगु दु । स्वनिगःया हे दकलय् ताःहाकःगु जात्राकथं म्हसीका वयाच्वंगु बुंगद्यःया जात्रा क्वचाःगु जानकारी बीगु ल्याखं छज्वः चखुंचा ब्वयेकेगु नापं थनया लगंख्यलय् च्वंगु सप्तपाताल पखुलिइ छज्वः न्या त्वतूगु खः ।

देय्या हे दकलय् ताःहाकःगु जात्रा धयातःगु बुंगद्यःया जात्रा औपचारिक रुपं क्वचाःगु जानकारी देवराज इन्द्रयात बीमाःगु धइगु मान्यता दयावयाच्व.गु दु । थ्व ल्याखं थुगुसीया बुंगद्यःया जात्रा औपाचारिक रुपं क्वचाःगु सुचं बीगु निंतिं छज्वः चखुंचा ब्वयेकेगु व छज्वः न्याः त्वःतूगु खः ।

बुंगद्यःया जात्रा क्वचाःगु जानकारी स्वर्गया जुजु देवराज इन्द्रयात याकेमाःगु धापू दु । थ्व ल्याखं मत्र्यमण्डलय् उकिया जानकारी बीत छज्वः चखुंचा ब्वयेकेगु व पातालय् जानकारी बीत छज्वः न्याः सप्तपाताल पुखुलिइ त्वःतेगु चलन दया वयाच्वंगु दु ।

चखुंचा ब्वयकेगु व पुखुलिइ न्या त्वःते न्ह्यः जात्रा क्वचाःगुया प्रक्रिया पूवंकेत सुथंनिसें यलं लगंख्यलय् च्वंगु बटुक भैरव द्यःयाथाय् माङ्साहुति यज्ञ याःगु खः । थथे यज्ञ याइबलय् चखुंचायात बाखं न्यंकेगु याइगु खः ।
वंगु बछलाथ्व पारु (बैशाख २७ गते) पूच्वय् बुंगद्यःयात रथय् बिज्याकाः न्ह्याःगु थुगुसीया बुंगद्यःया जात्रा वंगु साउन २० गते जाह्वलाख्यलय् बुंगद्यःया प्वाकलं (भोटो) जात्रा क्यनाः क्वचायेकूगु खः । भोटो क्यनेगु जात्रा क्वचाय् बुंगद्यःयात रथं कुहां बिज्याकाः खतय् तयाः बुंगय् बिज्याकूगु खः ।