कलाकार अरनिकोया लुमन्तिइ कला प्रदर्शनी

येँ- नेपाल ललितकला प्रज्ञा प्रष्तिठान (नाफा)या ग्वसालय् अरनिको स्मृति कला प्रदर्शनी जुइगु जूगु दु । प्रतिष्ठानपाखें राष्ट्रिय विभूति अरनिकोया लुमन्तिइ थ्व हे वइगु फागुनया लिपांगु वालय् उगु ब्वज्या यायेत्यंगु खः । फागुन २८ गते जुइगु अरनिको स्मृति कला प्रदर्शनीया निंतिं स्वनिगःया स्वंगुलिं लाय्कू लागाय् सछिम्ह मस्तय्त स्थलगत भ्रमण व कार्यशाला नं याइगु जूगु दु ।

प्रतिष्ठानं देय्या कलाकारिता ख्यःया विकास नापं नेपाःया मौलिक वास्तुकलयात अन्तर्राष्ट्रिय जगतय् नं न्यंकेत अरनिकों बिउगु योगदानयात लुमंकेकथं उगु प्रदर्शनी यायेत्यंगु खः । प्रदर्शनीया निंतिं नाफाया चित्रकला विभागया प्रमुख कलाकार सुष्मा राजभण्डारीयाकथं प्रदर्शनीया निंतिं वइगु फागुन ६ निसें २०गतेतक मस्तय्त स्वनिगःया स्वंगुलिं लाय्कू लागाया स्थलगत भ्रमण व कार्यशाला यायेगु तयारी यानाच्वंगु दु ।

अरनिकोया जन्म सन् १२४४ य् यलय् जूगु खःसा ६३ दँया उमेरय् सन् १३०६ लय् चीनय् मदुगु खः । प्रतिष्ठानं अरनिको मदुगु दिं मार्च ११ कुन्हु थगुने न्हापांखुसी स्मृति दिवस हंगु खः ।

बलबाहुया नामं नं परिचिति कलाकार अरनिकोया हे नेतृत्वय् चीन वंगु कलाकारया पुचलं सन् १२७१ य् राजधानी बेइजिंगय् नेपाली सीप व शैलीया प्यागोडा शैलीया चैत्य निर्माण याःगु खःसा उकिं विश्वय् नेपाःया मौलिकताया म्हसीका नं बिउगु खः ।
प्रतिष्ठानं अरनिकोया झ्वाता निर्माण यानाः परिसरय् तयेगु योजना नं दयेकाच्वंगु दु ।