सुनागूया बालकुमारी द्यःया क्षमा पुजा याइगु

यल- सुनागूया बालकुमारी द्यःया क्षमा पुजा याइगु जूगु दु । खुया यंकूम्ह द्यः लूगुलिं क्षमा पुजा यायेत्यंगु खः । थ्व हे वइगु फागुन ७ गतेकुन्हु बालकुमारी द्यःया क्षमा पुजा यायेत्यंगु खःसा उपकिया निंतिं सरोकारवालातय् व्यापक सहलह जुयाच्वंगु दु ।

बागमति प्रदेश सांसद राजकाजी महर्जनया कथं थ्व हे वइगु फागुन ७ गते बालकुमारी द्यःया क्षमा पुजा यायेगु क्वःजिउगु दु । स्थानीय जनप्रतिनिधि, गुथ्याः, स्थानीयवासी व सरोकारवाला दथुइ जूगु छगू मुँज्यां खुया यंकूम्ह द्यः लूगुलिं धार्मिक विधि विधानकथं क्षमा पुजा यायेगु नापं समय्बजि इनेगु नं क्वःजिउगु प्रदेश सांसद महर्जनं कनादिल ।

लिसें देगलय् आः विशेष सुरक्षा व्यवस्था याये सम्बन्धनय् नं सुरक्षा निकायलिसे सहलह जुयाच्वंगु दु । देगलय् विशेष सुरक्षा व्यवस्था यायेकथं लुखाय् सेन्सर, जीपीएस वा साइरनमध्ये गुगु उपयुक्त जुइ उगु प्रविधि जडान याइगु जूगु दु ।