न्हूगु विधेयकयात कयाः नेवाःतय् तयारी

येँ – सरकारं हःगु गुथि विधेयक राष्ट्रियसभां लित कायेधुंकाः आः न्हूगु विधेयक दयेकीबलय् उकी नेवाःतय्पाखें छु गज्याःगु खँ दुथ्याकेगु धकाः सहलह यायेगु तयारी शुरु जूगु दु । नेवाः न्ह्यलुवा पवित्र वज्राचार्यं आः न्हूगु गुथि विधेयक दयेकीबलय् न्हापा थःगु हे अध्यक्षताय् गठन जूगु गुथि व्यवस्थापन सम्बन्धी उच्चस्तरीय अध्ययन समितिया सुझाव कथं न्ह्याःवनेमाः धयादीगु दु ।

वय्कलं उगु सुझावय् आपालं खँ दुथ्यानाच्वंगु दु धासें उगु प्रतिवेदनयात आधार दयेकल धाःसा गुथि विधेयक दयेकेत अःपुइगु खँ कनादिल । वय्कलं न्हापा थःपिंसं पेश यानागु सुझावय् छुं छुं संशोधन यायेमालीगु अवस्था सुझाव आः नं उपयोगी जूगु खँ कनादिल ।

अथे हे नेवाः न्ह्यलुवा लिसें मानवअधिकारकर्मी मल्ल के. सुन्दरं आः न्हूगु गुथि विधेयक दयेकेगु विषययात कयाः बौद्धिक व्यक्तित्व, कानुन व्यवसायी व सम्बन्धित गुथिया दथुइ ब्यापक सहलह यायेगु तयारी जुयाच्वंगु खँ कनादिल ।

उकिया लागिं थ्वहे वइगु २० गते महाद्यः पार्वती दबुली थीथी जनजातिपाखें ऐक्यबद्धता सभा यायेगु ज्याझ्वः दुगु जानकारी नं वय्कलं बियादिल । आः दयेकीगु गुथि विधेयक थीथी अन्तर्राष्ट्रिय मूल्य मान्यताय् आधारित जुइमाःगु थुकिं नेवाःतय् प्रथाजन्य परम्परायात स्वायत्तता बीमाःगु खँ नं वय्कलं कनादिल ।